საქართველოს თავდაცვის ძალებს 415 სამხედრო მოსამსახურე შეემატა. სავალდებულო და საკონტრაქტო სამსახურის სამხედროებმა ფიცი მუხათგვერდის ძმათა სასაფლაოზე დადეს. ჯარისკაცებს ფიცის დადება თავდაცვის ძალების აღმოსავლეთის სარდალმა, პოლკოვნიკმა ალექსანდრე კიკნაძემ, წრთვნისა და სამხედრო განათლების სარდალმა, პოლკოვნიკმა გრიგოლ ჭელიძემ და თავდაცვის ძალების მთავარმა სერჟანტმა კობა ცირეკიძემ მიულოცეს.

დღეიდან 375 საკონტრაქტო და 40 სავალდებულო სამხედრო მოსამსახურე საქართველოს თავდაცვის ძალების შემადგენლობაში იმსახურებს. სავალდებულო სამხედრო მოსამსახურეები განახლებული პროგრამით 2016 წლის 29 ნოემბრიდან ემზადებიან. ჯარისკაცები გაუმჯობესებული სოციალური პაკეტით სარგებლობენ და უქმე დღეებში დასვენების შესაძლებლობაც აქვთ. მათ ათკვირიანი სრულყოფილი კურსი საკონტრაქტო სამხედრო მოსამსახურეებთან ერთად უფროსი სერჟანტ ზაზა ფერაძის სახელობის საწყისი საბრძოლო მომზადების (BCT) ცენტრში გაიარეს. მომზადების განმავლობაში ტაქტიკური, კავშირგაბმულობის, სამედიცინო, საცეცხლე და სამწყობრო მომზადებასთან დაკავშირებული უნარები განავითარეს და სადისციპლინო და საყარაულო წესდებები შეისწავლეს.

საზეიმო ღონისძიებაზე წარჩინებული სამხედრო მოსამსახურეები უწყებრივი მედლებით და მადლობის სიგელებით დაჯილდოვდნენ. საქართველოს თავდაცვის სამინისტროს ინიციატივით და განათლების, მეცნიერების, კულტურისა და სპორტის სამინისტროს მხარდაჭერით, სახელმწიფო ენის შემსწავლელი პროგრამის ფარგლებში ეროვნული უმცირესობის წარმომადგენელ წვევამდელებს სახელმწიფო ენის ცოდნის დამადასტურებელი სერტიფიკატებიც გადაეცათ.

ინფორმაციას თავდაცვის სამინისტროს პრესსამსახური ავრცელებს.