„მე მოვუწოდებ მთელ საქართველოს, მეგობრებო, ყველამ, განურჩევლად სქესის, ეროვნული კუთვნილების, პოლიტიკური ორიენტაციის, გადავიცვათ ყველამ წითელი ჟილეტები და შევუტიოთ ოლიგარქიულ სასახლეს და ისეთი ქარიშხალი მოვუწყოთ, რომელიც სიზმარშიც კი შეუძლებელია რომ წარმოიდგინონ“, განაცხადა შალვა ნათელაშვილმა სემეკთან, სადაც წითელ ჟილეტებში გამოწყობილმა „ლეიბორისტული პარტიის“ წევრებმა გაზის ტარიფის სავარაუდო გაძვირების საწინააღმდეგო აქცია გამართეს.

„როდესაც მთელი საქართველო გადაიცმევს აი ამ ჟილეტებს და გამოვა გარეთ, ოლიგარქიისგან, ივანიშვილისგან, ყაჩაღი ბანკირებისგან, არაფერი არ დარჩება და საქართველო დაუბრუნდება თავის მფლობელს, მის უდიდებულესობა ხალხს, ჩვენს ხალხს.

ფრანგებმა ყვითელი ფერი აირჩიეს, ჩვენ წითელი ფერით მოვედით, ჩვენი მიწა მორწყულია ჩვენი წინაპრების აი, ამ ფერის სისხლით და ჩვენ აი, ამ წითელი ფერით გავიმარჯვებთ... როდესაც დაინახავს ხელისუფლება, რომ ხალხი ერთად დგას, რომ ხალხი უკან არ იხევს, სამ დღეში დაემხობა აი, ეს თიხის ფეხებზე აგებული ბიძინა ივანიშვილის ნარკო-ბარონული რეჟიმი მეგობრებო, და ჩვენ ეს საქმე უნდა გავაკეთოთ. ეს არის ჩვენი მოვალეობა. ეს არის ჩვენი დიდგორი, ეს არის ჩვენი მარტყოფი... ეს ზამთარი უნდა იყოს ივანიშვილისათვის უკანასკნელი ზამთარი. გაზაფხულს, ეს პოლიტიკური რეჟიმი არ უნდა მოესწროს, არ უნდა შეხვდეს“, განაცხადა შალვა ნათელაშვილმა.