„ეს არის ქალბატონი ეკას პირადი პოზიცია და მან გააკეთა განმარტება“, განაცხადა საქართველოს პრემიერ მინისტრმა მამუკა ბახტაძემ ბრიფინგზე, რითაც გამოეხმაურა ეკა ბესელიას გადაწყვეტილებას დატოვოს იურიდიული კომიტეტის თავმჯდომარის პოსტი.

„ეს არის ქალბატონი ეკას პირადი პოზიცია და მან გააკეთა განმარტება. ჩემი პოზიცია ყოველთვის იქნება, რომ აღმასრულებელი ხელისუფლება არასდროს არ უნდა ჩაერიოს სხვა ხელისუფლების შტოში მიმდინარე პროცესებში. თქვენ მოგეწონებათ, როგორც ხდებოდა, ქვეყნის პირველი პირები ურეკავდნენ მოსამართლეებს და თავის მოსაზრებებს ეუბნებოდნენ?!. ვფიქრობ, ეს არის სრულიად მიუღებელი. ჩვენ ვაშენებთ სამართლებრივ ქვეყანას, გვაქვს ახალი, გამართული კონსტიტუცია და ყველამ ამ კონსტიტუციის ფარგლებში უნდა ვიმუშაოთ“, განაცხადა მამუკა ბახტაძემ და ეკა ბესელიას მიერ ვანო ზარდიაშვილის შესახებ გაკეთებული განცხადების შეფასებისას აღნიშნა: „ღმერთმა არ ქნას, რომ ყველა საკითხზე იყოს აზრთა ერთობლიობა. ჩვენ გვაქვს ეროვნული ინტერესები და პოლიტიკური გუნდი არის თანხვედრაში. ეს არის პოლიტიკური, ცოცხალი პროცესი და ყველა ადამიანს შეიძლება ჰქონდეს თავისი კონკრეტული შეხედულება, ის თავისუფალია თავის არჩევანში და იმ კომუნიკაციაში, რაც აქვს საზოგადოებასთან“.