პარლამენტის იურიდიულ საკითხთა კომიტეტის თავმჯდომარის პოსტიდან წასულმა ეკა ბესელიამ საპარლამენტო უმრავლესობის წევრის, ადამიანის უფლებათა დაცვის კომიტეტის ხელმძღვანელის, სოფიო კილაძის მიერ მის მიმართ გამოთქმულ კრიტიკას უპასუხა და „ქართული ოცნების“ დეპუტატს და სხვებსაც ურჩია, რომ „ცოტა გაიაზრონ პასუხისმგებლობა და ისე ილაპარაკონ“.

„ახლა შევედით ისეთ საინტერესო ფაზაში, მეორე ეტაპს ნაადრევად დავიწყებ ალბათ და მერე ვიღაც არ აღმოჩნდეს კიდევ უხერხულ მდგომარეობაში. ყველას ვურჩევ, ვინც დაკავებულია და იმ პოზიციით, რომ ვერ გაუგია, სად არის და რატომ არის, ცოტა გაიაზროს პასუხისმგებლობა და ისე ილაპარაკოს, რადგან იმ ზონაში შევა, სადაც თავად დაიკარგება და ვეღარ გამოაგნებს გზას. უმჯობესია, ცოტა წინდახედულება და პასუხისმგებლობა გამოიჩინოს ყველამ, როცა ასეთ შეფასებებს გააკეთებს”, განაცხადა ეკა ბესელიამ.

ეკა ბესელიას დღეს სოფიო კილაძე დაუპირისპირდა და იკითხა, თუ რატომ ხდება ბესელიას პოსტიდან წასვლის დაკავშირება მოსამართლეების თემასთან მაშინ, როცა მისი თანამდებობიდან წასვლის საკითხზე, ჯერ კიდევ 2-3 თვის წინ საუბრობდნენ ჟურნალისტები.