ამერიკის შეერთებული შტატების ყოფილმა პირველმა ლედიმ მიშელ ობამამ „ამერიკის ყველაზე თაყვანსაცემი ქალის“ ტიტული მოიპოვა და ჰილარი კლინტონის 17-წლიანი ლიდერობა დაასრულა.

Gallup-ის მიერ ჩატარებულ ყოველწლიურ გამოკითხვაში კლინტონმა, ყოფილმა საპრეზიდენტო კანდიდატმა, ყოფილმა სახელმწიფო მდივანმა და პირველმა ლედიმ მესამე ადგილზე გადაინაცვლა, მეორე ადგილი კი ამერიკელ ტელეწამყვანს, ოპრა უინფრის ხვდა წილად.

„ამერიკის ყველაზე თაყვანსაცემი მამაკაცის“ ტიტულს 11 წელია ბარაქ ობამა ინარჩუნებს, ხოლო პრეზიდენტი დონალდ ტრამპი უკვე ზედიზედ, ბოლო 4 წლის განმავლობაში მეორე ადგილს იკავებს.

BBC-ის ცნობით, გამოკითხვა 1946 წლის შემდეგ ყოველ წელიწადს ტარდება და გამონაკლისი მხოლოდ 1976 წელი იყო.

გამოკითხვაში მონაწილე 1 025 სრულწლოვან ადამიანს ჰკითხეს, დაესახელებინათ მსოფლიოს ნებისმიერ წერტილში მცხოვრები ის მამაკაცი და ქალი, რომელთაც ისინი ყველაზე მეტად ეთაყვანებიან.

ყველაზე თაყვანსაცემი ქალი

 მიშელ ობამა - 15%

 ოპრა უინფრი - 5%

 ჰილარი კლინტონი- 4%

 მელანია ტრამპი - 4%

 დედოფალი ელისაბედ II - 2%

ყველაზე თაყვანსაცემი მამაკაცი

 ბარაქ ობამა - 19%

 დონალდ ტრამპი - 13%

 ჯორჯ ჰერბერტ უოკერ ბუში - 2%

 პაპი ფრანცისკე - 2%

 ბილ გეიტსი 1%

ჰილარი კლინტონი, ყოფილი ამერიკელი სენატორი და სახელმწიფო მდივანი, რომელიც 2016 წელს „დემოკრატიული პარტიის“ საპრეზიდენტო კანდიდატი იყო, სიის სათავეში 22-ჯერ მოექცა, მათ შორის ბოლო 17 წლის განმავლობაში პირველობას უცვლელად ინარჩუნებდა.

ოპრა უინფრი კი პირველ ადგილზე არასდროს მოხვედრილა, თუმცა მეორე ადგილს უკვე 14 წელია რაც იკავებს.

თუკი ბარაქ ობამა მომავალ წელსაც პირველ ადგილზე აღმოჩნდება, იგი მოხსნის ყოფილი პრეზიდენტის დუაიტ ეიზენჰაუერის რეკორდს, რომელმაც ყველაზე მეტად თაყვანსაცემი მამაკაცის ტიტული 12-ჯერ მოიპოვა, აცხადებენ Gallup-ში.

დონალდ ტრამპი ჯერჯერობით მხოლოდ ორ პრეზიდენტს შორის ერთ-ერთია, რომელსაც თეთრი სახლის ხელმძღვანელობისას პირველობის ტიტული არ რგებია წილად. მეორე ასეთი ჯერალდ ფორდი იყო.

Gallup-მა განაცხადა, რომ კვლევის, რომელიც 3-დან 12 დეკემბრამდე პერიოდში ჩატარდა, ცდომილება პლუს-მინუს 4 პროცენტია.