ფრაქცია „ქართული ოცნების“ წევრი, მცხეთის მაჟორიტარი დეპუტატი დიმიტრი ხუნდაძე მათი რიგებიდან ეკა ბესელიას შესაძლო გარიცხვის თაობაზე დასმულ შეკითხვას პირდაპირ არ პასუხობს და მხოლოდ იმას ამბობს, რომ ყველამ უნდა დაიცვას გუნდურობა, შიდა საკითხები გარეთ არ უნდა გამოდიოდეს და „ქართული ოცნების“ თითოეული წევრის პასუხისმგებლობა უნდა იყოს, რომ გუნდის მთავარი წესები დაცული იყოს.

„იმართება ფრაქციის ხდომა. ვფიქრობ, ეს აუცილებელი იყო, რამეთუ წლის დასაწყისია და ფრაქცია დაგეგმავს, როგორ უნდა იმუშაოს წლის განმავლობაში. რა თქმა უნდა, იქნება პრობლემური საკითხების განხილვაც. მთავარი, ვფიქრობ, არის ის, რომ ყველამ უნდა დაიცვას გუნდურობა და მთავარი წესი, რომ შიდა საკითხები გარეთ არ გამოვიდეს“, განუცხადა ჟურნალისტებს სხდომის დაწყებამდე დიმიტრი ხუნდაძემ.

მან არ დააკონკრეტა გამოიტანა თუ არა ეკა ბესელიამ გუნდის შიდა საკითხები გარეთ და პერსონიფიცირებისაგან თავი შეიკავა. მან ასევე პირდაპირ არ უპასუხა შეკითხვას, დაუჭერს თუ არა მხარს ბესელიას ფრაქციიდან გარიცხვის საკითხს, თუკი ეს დღევანდელი სხდომის დღის წესრიგით განიხილება.

„მე ასეთი პერსონიფიცირებისაგან თავს შევიკავებ. მე პრინციპებზე ვამახვილებ ყურადღებას და კონკრეტული დეტალები იქნება ფრაქციაზე განხილული. მე მექნება პოზიცია, რომ გუნდის მთავარი წესი, გუნდურობა ეხება გუნდის თითოეულ წევრს. ამიტომ თითოეული წევრის პასუხისმგებლობა უნდა იყოს, რომ გუნდის მთავარი წესები იქნას დაცული“, აღნიშნა ხუნდაძემ.