ეკა ბესელია უარყოფს ექსპერტ გია აბაშიძის მიერ გავრცელებულ ინფორმაციას, რომლის მიხედვითაც, იურიდიულ საკითხთა კომიტეტის ყოფილმა თავმჯდომარემ „ზაზა ოქუაშვილისგან აიღო ქრთამი „ომეგას“ მრავალმილიონიანი დავის მოსაგვარებლად".

როგორც ბესელიამ ლონდონიდან „რუსთავი 2"-თან სატელეფონო საუბრისას განაცხადა, პროვოკაციებს ელოდა და დარწმუნებულია, რომ გია აბაშიძე კონკრეტული ჯგუფის დავალებას ასრულებს.

„ეს იმდენად დიდი აბსურდია და ეს ისეთი სიგიჟეა, ისეთი სამარცხვინოა, რაც გია აბაშიძემ დაწერა, შინაარსში არ შევალ, მაგრამ რა არის ამ ყველაფრის პოლიტიკური მხარე, ამას ვხვდები.... გია აბაშიძისგან მიკვირს, ვინ დაავალა ასეთი რამის დაწერა? რაღაც ბმას ვხედავ იმაში, რომ დაახლოებით, 2-3 დღის წინ მითხრეს, რომ რაღაც ტიპის პროვოკაცია მზადდებოდა.... დარწმუნებული ვარ დავალებაა, ვინ დაავალა ამას გავარკვევ. არ მინდა დავიჯერო და არ მინდა ვიფიქრო, რომ ეს არის ის ფორმა და ის გზა, რომლითაც რაღაც ჯგუფმა ჩემთან ომი გადაწყვიტა", აცხადებს ეკა ბესელია.