„ევროპულ საქართველოში" ეხმაურებიან მედიაში გავრცელებულ ინფორმაციას, რომლის მიხედვითაც, ბიძინა ივანიშვილი კანაფის კულტივაციის შესახებ კანონპროექტის პარლამენტიდან გაწვევის გამო, მმართველ გუნდს დაუპირისპირდა.

ზურაბ ჭიაბერაშვილის აზრით, აღნიშნული კანონპროექტის საკანონმდებლო ორგანოში დაბრუნების შანსი ძალიან მაღალია.

„ის, რომ ბიძინა ივანიშვილმა ისევ წამოსწია ეს თემა, მეტყველებს ერთ რამეზე, რომ მას თავში აქვს ამ მეთოდით თავისი ქონების კიდევ უფრო მეტად გაზრდა. ის დროებით დაიხევს ხოლმე უკან და ასე მოხდა პირველი ტურის შემდეგ, როდესაც მას ძალიან შეეშინდა წაგების და გააკეთა ყველაფერი, იკადრა ყველაფერი, რაც კი შეიძლება ძალადობა, მოსყიდვა, დაშინება ყოფილიყო მეორე ტურისთვის. ბუნებრივია, მას შემდეგ, რაც ასრულდა საპრეზიდენტო არჩევნები, მას ექნება სურვილი, რომ ეს თემა წამოწიოს და მას ჰყავს იმ ტიპის უმრავლესობა, რომელიც ყველაფერში ეთანხმება ივანიშვილს იმიტომ, რომ ივანიშვილის გარეშე ეს პოლიტიკური გუნდი არ არსებობს. ბუნებრივია, შანსი იმისა, რომ ივანიშვილმა კვლავ შემოატანინოს მათ პარლამენტში ეს კანონპროექტი და მიაღებინოს, ძალიან მაღალია", განაცხადა „რუსთავი 2"-თან საუბრისას ზურაბ ჭიაბერაშვილმა.