საპარლამენტო უმრავლესობის წევრი, იურიდიულ საკითხთა კომიტეტის ყოფილი თავმჯდომარე ეკა ბესელია პარლამენტის თავმჯდომარის, ირაკლი კობახიძის განცხადებას პასუხობს.

„მშვიდობაში მას პოლიტსაბჭოში ადგილი და მშვიდობაში მათ შორის, ის კაბინეტი, რომელთანაც იდგა დღეს და რომელსაც თურმე ჩემთვის ამზადებდნენ, მშვიდობაში. მე კაბინეტებისთვის და თანამდებობისთვის არასდროს არ მიბრძოლია და ეს ასახსნელიც არ მაქვს. ეს მან უნდა ახსნას, ვინც 2016 წელს გამოჩნდა და ვისი ბიოგრაფიაც ბევრ კითხვის ნიშანს ტოვებს. მე ასახსნელი არაფერი არ მაქვს. კაბინეტები მას მშვიდობაში. ვიდრე ის ამ კაბინეტს იცავს, მე ამ ფასეულობებს დავიცავ, რასაც ასევე ვიცავდი. მე პარლამენტის თავმჯდომარეს ვუსურვებ, ირაკლი კობახიძე პოლიტიკაში ახალია და მე ნამდვილად ვგულშემატკივრობ, რომ მან არ დაუშვას ისეთი შეცდომები, რომელიც ინსტიტუციას დააზარალებს. მან პირველმა დაარღვია ის წესი, რომლისკენაც მიუთითებს გუნდის სხვა წევრებს, ვგულისხმობ იმას, რომ ჩემი განცხადება გადადგომის თაობაზე, როდესაც გაკეთდა, მან პირველმა გააკეთა კრიტიკული და საპირისპირო განცხადება და ეს იყო სიცრუე, როდესაც სცადა სხვა ვერსია შემოეტანა ამ პროცესში და ეს ვერსია უბრალოდ ბუნებაში არ არსებობს. ბიძინა ივანიშვილს თუ აბრალებს ირაკლი კობახიძე პარასკევს რომ სხდომის ჩატარება უნდოდათ, ეს იქნება დიდი უსამართლობა იმიტომ, რომ პროცედურულად როდის რა სხდომა შეიძლება ჩაინიშნოს, ასეთი ნიუანსები იცის მხოლოდ პარლამენტის წევრმა და პარლამენტის თავმჯდომარემ და ირაკლი კობახიძეს ჰქონდა სწორედ ეს იდეა, რომ პარასკევს ჩამეტარებინა მე სხდომა, სადაც დღის წესრიგში იქნებოდა მოსამართლეთა სია ჩასმული, დაჩქარებული წესით", განაცხადა ეკა ბესელიამ ჟურნალისტებთან საუბრისას.

ირაკლი კობახიძემ ჟურნალისტებს უთხრა, რომ ვიცე-სპიკერების ფლიგელში ბესელიასთვის ოთახის მოწყობის შესახებ დავალება აპარატს სექტემბერში მისცა.