პარლამენტის იურიდიული კომიტეტის ყოფილი თავმჯდომარის ეკა ბესელიას „ქართულ ოცნებაში“ ყოფნა-არყოფნის საკითხი გადაწყდება საპარლამენტო უმრავლესობის შეხვედრაზე, რომელიც უახლოეს დღეებში გაიმართება და მას პარტიის თავმჯდომარე ბიძინა ივანიშვილიც დაესწრება.

„თვითონ სუბიექტის მიერ უნდა მოხდეს გადაწყვეტილების მიღება. ჩემი მოლოდინია, რომ რა თქმა უნდა იქნება იმის საშუალება, რომ მას საკუთარი პოზიციების დაფიქსირების საშუალება მიეცეს და რა თქმა უნდა გვექნება მსჯელობა“, განაცხადა ბრიფინგზე პარლამენტის საპროცედურო საკითხთა და წესების კომიტეტის თავმჯდომარის პირველმა მოადგილემ გურამ მაჭარაშვილმა.

უზენაესი სასამართლოს მოსამართლეთა კანდიდატურებთან დაკავშირებით ბესელია უკან დახევას არ აპირებს და ამბობს, რომ უმრავლესობის დეპუტატებმა უნდა - „ყველამ სათითაოდ დააფიქსიროს თავისი პოზიცია ღია და საჯაროდ, რას ფიქრობს ამ სიასთან დაკავშირებით“.

„რა დავალებით ისაუბრებს კახა კუჭავა ან სხვა რომელიმე კოლეგა და მდინარაძე, ეს გასაგებია, რომ ეს არის იმ ჯგუფის პოზიცია, რომელსაც არ გამოუხატავს თავისი პროტესტი და არ გამოუხატავს თავისი წინააღმდეგობრივი დამოკიდებულება ამ პროცესის მიმართ და ამ სიის მიმართ და ამიტომ, მოდით, ყველამ სათითაოდ დააფიქსიროს თავისი პოზიცია ღია და საჯაროდ, რას ფიქრობს ამ სიასთან დაკავშირებით - უნდა იყოს თუ არა ეს სია გაწვეული და დაუჭერენ თუ არა ამ სიას მხარს“, განაცხადა ბესელიამ ჟურნალისტებთან საუბრისას.