„თიბისი ბანკის“ მიმართ მთავარი პროკურატურის მიერ დაწყებული გამოძიება „ნაციონალური მოძრაობისთვის“ იმის მანიშნებელია, რომ ივანიშვილი ცდილობს დაამყაროს კონტროლი მსხვილ საფინანსო ინსტიტუტებზე და „ფაქტობრივად გახდეს იგი ერთმმართველი ქვეყნისა“.

„ფინანსური სისტემების სრული კონტროლისთვის ბრძოლა დიდი ხანია მიდის, მრავალი ინსტიტუციური ცვლილება განხორციელდა, მათ შორის საბანკო-საფინანსო სფეროში, მონიტორინგის სამსახურის გარეთ გაყვანა და ა.შ. აგრეთვე მოსახლეობის სავსებით სამართლიანი გულისწყრომა ბანკებისადმი კიდევ უფრო მეტად იქნა გაღვივებული ბახტაძის ამ ჭარბვალიანობის ფილოსოფიითა და ზოგადად, საბანკო რეგულირების აი ამ თემის წამოწევით და ახლა მიაჩნიათ, რომ უკვე საზოგადოება მზად არის იმისათვის, რომ დაამყაროს ივანიშვილმა კონტროლი მსხვილ საფინანსო ინსტიტუტებზე - ფაქტობრივად გახდეს იგი ერთმმართველი ქვეყნისა. ეს ჰგავს დაახლოებით იმ სქემას, რაც გააკეთა პუტინმა“, განაცხადა ფრაქცია „ნაციონალური მოძრაობის“ თავმჯდომარემ, რომან გოცირიძემ „რუსთავი 2“-თან საუბრისას.