„მოვუწოდებ ბატონ ბიძინასაც და ყველას ჩვენი გუნდის წევრებს, რომ ვუერთგულოთ იმ გუნდს, ვისთან ერთადაც 2012 წლის 1-ელ ოქტომბერს მოვიგეთ“, - განაცხადა დეპუტატმა გედევან ფოფხაძემ ბიძინა ივანიშვილის დღევანდელი განცხადების საპასუხოდ.

„გუნდში არიან ადამიანები, რომლებიც ლოიალური არიან ამ სიის [მოსამართლეების] მიმართ და ვართ ადამიანები, რომლებიც პრინციპულად წინააღმდეგები ვართ. რაც შეეხება გუნდურობას. მე ხაზგასმით მინდა ვთქვა, რომ ჩვენი გუნდურობა გამოიხატება იმ ღირებულებების და პრინციპების ერთგულებაში, რითაც ჩვენ მოვიგეთ 2012 წლის 1-ელი ოქტომბრის არჩევნები. ჩემი გუნდი არის ის ხალხი, რომლებიც ციხეში სანთლით ხელში ლოცულობდნენ ჩვენი გამარჯვებისთვის და ღამეს ათევდნენ საარჩევნო უბნებთან. ეს არის ჩემი გუნდი. მე ამ გუნდს არასდროს არ ვუღალატებ და არასდროს არ მივატოვებ. პრინციპები და ღირებულებები იმ ადამიანებთან ჩვენ არავითარ შემთხვევაში არ შეგვიცვლია და იმ ადამიანებისთვის სააკაშვილის ზონდერ-მოსამართლეების დანიშვნა არასოდეს არ იქნება მისაღები. მოვუწოდებ ბატონ ბიძინასაც და ყველას ჩვენი გუნდის წევრებს, რომ ვუერთგულოთ იმ გუნდს, ვისთან ერთადაც 2012 წლის 1-ელ ოქტომბერს მოვიგეთ, ვისთან ერთადაც 2011 წელი დავიწყეთ. გავიხსენოთ ეს ყველაფერი, რა ხდებოდა, რატომ იდგა ხალხი ჩვენს გვერდზე, რატომ გამოვიდა ქუჩაში, რატომ იყო ხალხისთვის ყველაზე მტკივნეული - სამართლიანობა იყო მთავარი მოთხოვნა საზოგადოების მხრიდან. კარგით, დავუშვათ, ის მოსამართლეები, რომლებიც გარანტები იყვნენ კანონის დარღვევის, ციხეებში დღეს არ ზიან, დავუშვათ, თუმცა მე მგონია, რომ ბევრი უნდა იჯდეს ციხეში მათ შორის. მე მორალს კი არ უნდა მიკითხავდნენ, უნდა იხდიდნენ იმ სასჯელებს, რომელსაც იმსახურებდნენ იმისათვის, რომ აი, იმ სისტემურ დანაშაულში იყვნენ ჩვეულებრივი თანამონაწილეები“, განაცხადა გედევან ფოფხაძემ.