ამერიკის შეერთებული შტატები იმუშავებს მოკავშირეებთან, რომ „ბოლო ირანული ჩექმა გააძევოს“ სირიიდან, განაცხადა აშშ-ის სახელმწიფო მდივანმა მაიკ პომპეომ ქაიროში, სამი კვირის შემდეგ, რაც პრეზიდენტმა დონალდ ტრამპმა გამოაცხადა, რომ ამერიკული საჯარისო ნაწილები სირიიდან სრულად გამოვლენ - გადაწყვეტილება, რამაც შოკში ჩააგდო აშშ-ის მოკავშირეები და ვაშინგტონშიც მკაცრი კრიტიკა გამოიწვია, როგორც ტრამპის ოპონენტებში, ისე მის თანაგუნდელებშიც და ამის მაგალითი თავდაცვის მდივნის ჯეიმს მატისის თანამდებობიდან წასვლის გადაწყვეტილება იყო.  

პომპეომ ასევე გააკრიტიკა ყოფილი პრეზიდენტის, ბარაქ ობამას ახლო აღმოსავლეთის პოლიტიკა, განაცხადა რა, რომ მან „საშინელი გადაწყვეტილება“ მიიღო.

ტრამპის მოულოდნელი განცხადების შემდეგ მოკავშირეების დაშოშმინების მცდელობისას პომპეომ თქვა: „ამერიკა უკან არ დაიხევს მანამ, სანამ ტერორის წინააღმდეგ ბრძოლა არ დასრულდება. ჩვენ დაუღალავად ვიბრძოლებთ თქვენს გვერდით, რომ დავამარცხოთ „ისლამური სახელმწიფო“, ალ-ყაიდა და სხვა ჯიჰადისტები, რომლებიც საფრთხეს უქმნიან ჩვენს და თქვენს უსაფრთხოებას“.

მან აღნიშნა, რომ აშშ „სიკეთის ძალაა“ ახლო აღმოსავლეთში და „სადაც ამერიკის უკან დახევას აქვს ადგილი, იქ ამას ქაოსი მოჰყვება“.