კენიის პრეზიდენტმა უჰურუ კენიატამ განაცხადა, რომ ნაირობიში მებრძოლთა მიერ სასტუმროზე განხორციელებული თავდასხმის სალიკვიდაციო სპეცოპერაცია დასრულებულია და ყველა „ტერორისტი ლიკვიდირებულია“.

შეიარაღებულმა მამაკაცებმა კენიის დედაქალაქის ვესტლენდის რაიონში მდებარე სასტუმრო კომპლექსზე თავდასხმა სამშაბათს განახორციელეს და სულ მცირე 14 ადამიანი მოკლეს. სროლისა და აფეთქებების ხმა ოთხშაბათ დილამდე ისმოდა.

სომალიში ბაზირებულმა მებრძოლთა ჯგუფმა „ალ-შაბაბმა“ განაცხადა, რომ თავდასხმის უკან ის იდგა. უცნობია თუ რამდენი თავმდამსხმელი მოქმედებდა.

სატელევიზიო მიმართვისას კენიატამ თქვა, რომ დაღუპულია 14 ადამიანი, მაგრამ სასტუმრო კომპლექსიდან 700-ზე მეტის ევაკუაცია უსაფრთხოდ მოხერხდა.

კენიის „წითელი ჯვრის“ ცნობით კი, მოკლულთა რაოდენობა 24-ს შეადგენს.

აშშ-ის სახელმწიფო დეპარტამენტმა დაადასტურა, რომ მოკლულთა შორის ამერიკის მოქალაქეცაა და შიშობენ, რომ ასევე დაღუპულია დიდი ბრიტანეთის მოქალაქე.

„ახლა შემიძლია დავადასტურო, რომ უსაფრთხოების ოპერაცია სასტუმრო Dusit-ში დასრულებულია და ყველა ტერორისტი ლიკვიდირებულია. ჩვენ მოვძებნით ყველა იმ პირს, რომელიც ამ საშინელი აქტის დაფინანსებაში, დაგეგმვაში და აღსრულებაში იყო ჩართული. ჩვენ ვართ ქვეყანა, რომელიც კანონებით და წესებით იმართება - ქვეყანა, რომელიც მშვიდობიან თანაარსებობას მიჰყვება... მე ასევე უნდა განვაცხადო, რომ ჩვენ ვართ სახელმწიფო, რომელიც არასოდეს დაივიწყებს მათ, ვინც ტკივილს აყენებს ჩვენს ბავშვებს“, თქვა კენიის პრეზიდენტმა.