დიდ დიღომში საცხოვრებელ კორპუსში სავარაუდოდ გაზის გაჟონვის შედეგად კორპუსის ნაწილი ჩამოიშალა.

ამ დროისთვის დადასტურებული ინფორმაციით, დაღუპულია სამი ზრდასრული ადამიანი. მსხვერპლის შესახებ ინფორმაცია მედიასთან ცოტა ხნის წინ საპატრულო პოლიციის ხელმძღვანელმა თემურ კუპატაძემ დაადასტურა. მისი თქმით, საცხოვრებელი კორპუსიდან მოსახლეობა უკვე ევაკუირებულია. 

„კორპუსი უკვე მთლიანად ევაკუირებულია. ამ დროისთვის არავის სიცოცხლე საფრთხე არ ემუქრება. ერთი ადამიანი იყო ნანგრევებში და მისი მდგომარეობა დამაკმაყოფილებელი იყო, როცა სასწრაფო დახმარების ბრიგადამ გადაიყვანა“, უთხრა ჟურნალისტებს საპატრულო პოლიციის უფროსმა თეიმურაზ კუპატაძემ. 

არიან დაშავებულები, მათ შორის მცირეწლოვანები, რომლებიც საავადმყოფოებში არიან გადაყვანილი. ჯანდაცვის მინისტრის, დავით სერგეენკოს თქმით, იაშვილის კლინიკაში სამი ბავშვია მოთავსებული, მათგან ორის ჯანმრთელობის  მდგომარეობა მსუბუქია, ერთის კი საშუალო სიმძიმის. გარდა ამისა, კიდევ ერთი მოზარდი ამ წუთებში გადაჰყავთ ღუდუშაურის კლინიკაში და მისი მდგომარეობა "საყურადღებოა". 

დიდ დიღომში აფეთქება წინასწარი მონაცემებით გაზის გაჟონვამ გამოიწვია. აფეთქება ავთანდილის ქუჩაზე, ახალაშენებული საცხოვრებელი კორპუსის მე-6 სართულზე მოხდა. კორპუსის მცხოვრებთა განცხადებით, დღის განმავლობაში საცხოვრებელ კორპუსში დღის განმავლობაში ბუნებრივი აირის მძაფრი სუნი იგრძნობოდა, რის გამოც მათ „ყაზტრანსგაზის“ ბრიგადა გამოიძახეს, თუმცა ადგილზე მისულმა კომპანიის თანამშრომლებმა საშიში ვერაფერი შენიშნეს და უკან გაბრუნდნენ. რამდენიმე საათში კი კორპუსში ძლიერი აფეთქება მოხდა.  

უბედური შემთხვევის ადგილზე იმყოფებიან პრემიერ მინისტრი მამუკა ბახტაძე და თბილისის მერი კახა კალაძე.