არქიტექტორ გიგა ბათიაშვილის განცხადებით, სპეციალისტებმა მერიას ვერეს ხეობაში გამავალი ავტომაგისტრალის დაზიანებული მონაკვეთის დროებით აღდგენის რეკომენდაცია მისცეს.


როგორც გიგა ბათიაშვილმა დღეს გამართულ პრესკონფერენციაზე განაცხადა, დედაქალაქის ხელმძღვანელობას სპეციალისტებთან არაერთი შეხვედრა ჰქონდა და გამომდინარე იქედან, რომ მდინარე ვერეს ხეობაში გამავალი მაგისტრალია ქალაქის სატრანსპორტო ინფრასტრუქუტრისთვის ძალიან მნიშვნელოვანია, ამ ეტაპზე მასზე უარის თქმა არასწორი იქნებოდა.


"მოდის სექტემბერი, სწავლის დაწყების, მოსახლეობის რეგიონებიდან თბილისში დაბრუნების პერიოდი, თუ ამ დროისთვის გზა არ იქნება ამუშავებული, ამან შესაძლოა სატრანსპორტო სისტემაში ძალიან მძიმე შედეგები გამოიწვიოს. ამდენად, მივიღეთ გადაწყვეტილება, ქალაქიც დაეთანხმა, რომ მოშლილი მონაკვეთი იყოს დროებით აღდგენილი, რათა შეიძლებოდეს მოძრაობის გაცოცხლება მაინც. დამუშავდეს ახალი პროექტი მთელი თბილისის მონაკვეთზე მდინარე ვერეს მიმართ დამოკიდებულებიდან გამომდინარე, როგორი უნდა იყოს ღონისძიებები", - აღნიშნა გიგა ბათიაშვილმა.


მისივე ინფორმაციით, იყო რეკომენდაციები, რომ ძირითადი ყურადღება გადატანილი ყოფილიყო თბილისის ზევით, მდინარე ვერეზე რამდენიმე კაშხლის აშენებაზე, რომელიც წყალდიდობის დროს წყლებს დააგუბებდა, მაგრამ არქიტექტორის განმარტებით, ქრესტომატიული გადაწყვეტილება არსებობს, რომ ქალაქების თავზე დამბები არ აშენდეს, რადგან რისკის ფაქტორი მაინც რჩება.


გიგა ბათიაშვილის თქმით, მდინარე ვერეს ხეობაში სასიგნალო აპარატურის დაყენება ძალიან ოპერატიულად მოხდა, რომელიც მდინარის ქცევას გვამცნობს.


არქიტექტორის ინფორმაციით, თვის ბოლოს, სხვადასხვა ჯგუფებმა თბილისის გენგეგმის შესაქმნელად კონცეფცია უნდა წარადგინონ.