მე იმედი მაქვს რომ დღეს მთელი დღე დაეთმობა მოსამართლეების საკითხს, განაცხადა ფრაქცია „ქართული ოცნება - სოციალ-დემოკრატების“ თავმჯდომარის მოადგილემ, ბექა ნაცვლიშვილმა „ქართული ოცნების“ ოფისთან, სადაც ბიძინა ივანიშვილის ხელმძღვანელობით დღეს საპარლამენტო უმრავლესობის სხდომა იმართება.

მან აღნიშნა, რომ დღევანდელ სხდომაზე პარტიიდან ვინმეს გარიცხვის საკითხი არ დადგება, თუმცა „ყველას შეუძლია გადაწყვეტილება ინდივიდუალურად მიიღოს“.

„რიგმა დეპუტატებმა დავაფიქსირეთ ღია და მკაფიო პოზიცია იმ უზენაესი სასამართლოს მოსამართლეთა სიის მიმართ, რომელიც იყო წარმოდგენილი პარლამენტში. თუ ამაზე კონსენსუნსი არსებობს, რომ ჩვენ ამ ადამიანებს აღარ განვიხილავთ უკვე მომავალში როგორც უზენაეს სასამართლოში უვადოდ განწესების მიზნით, მაშინ, შესაბამისად უნდა ვიმსჯელოთ როგორ ჩამოვყალიბდეთ, რა კრიტერიუმები და რა პროცედურები შევთავაზოთ ზოგადად საზოგადოებას. გარდა ამისა, ახლა არის უნიკალური შანსი, თუ რაიმე ხარვეზია სასამართლო რეფორმაში დაშვებული, ამ ხარვეზების გამოსწორების იმიტომ, რომ ეს არის პროცესი, რომელიც ამის გარეშე არ უნდა დასრულდეს“, განაცხადა ბექა ნაცვლიშვილმა და დაამატა, რომ იმ შემთხვევაში, თუკი შეთანხმება ვერ შედგება, გადაწყვეტილებას ყველა ინდივიდუალურად მიიღებს და შესაძლოა, ეს გადაწყვეტილება გუნდის დატოვებაც იყოს.

„ყველამ ინდივიდუალურად მიიღოს გადაწყვეტილება. ძალიან მარტივია, იმიტომ რომ, თუ ამხელა აზრთა სხვადასხვაობები არსებობს, ე.ი. შესაბამისად, ეს ადამიანები ვერ თანხმდებიან“, აღნიშნა დეპუტატმა.