ბიძინა ივანიშვილის საპარლამენტო უმრავლესობასთან შეხვედრის დასრულების შემდეგ, დეპუტატმა ზაქარია ქუცნაშვილმა განაცხადა, რომ ბიძინა ივანიშვილი სხდომაზე იქცეოდა, როგორც გამაერთიანებელი ლიდერი და მმართველი გუნდიდან ვინმეს გარიცხვაზე საუბარი არ ყოფილა. 

„ბატონმა ბიძინამ თქვა, რომ იგ არ დაზოგავს არც პირად დროს და არც პირად ენერგიას იმისათვის, რომ საზოგადოებასთან და გუნდთან მოხდეს შეთანხმება. ის იქცეოდა დღეს, როგორც გამაერთიანებელი ლიდერი და ცდილობდა ყველასთვის მოესმინა, ვინც კი ამ საკითხზე საკუთარ აზრს გამოთქვამდა. მეც ვერ შევძელი საკუთარი აზრის გამოთქმა იმიტომ, რომ ჩემს წინ ბევრი იყო ჩაწერილი, ამიტომაც თვითონ თქვა, რო ხვალაც გავაგრძელოთ ამ საკითხზე მსჯელობა და რამდენი დროც იქნება საჭირო, იმდენი დრო დავხარჯოთ ამ საკითხზე.

ჩვენ თვალწინ იბადება, უნდა დავბადოთ თავისუფალი სასამართლო ხელისუფლება. ეს ძალიან სერიოზული პროცესია. მოგეხსენებათ, მე-9 მოწვევის პარლამენტი გვყავს და საზოგადოებაში კიდევ არის კითხვები დემოკრატიასთან მიმართებაში. სასამართლო ხელისუფლება, უზენაესი სასამართლოს ხელისუფლება ახლა იბადება იმ თვალსაზრისით, რომ შეირჩეს ახალი წესები, ახალი კრიტერიუმები და ამის საფუძველზე მოხდეს წარდგენა“, აღნიშნა ქუცნაშვილმა და დაამატა:

„დისკუსია ძირითადად წარიმართა სასამართლო ხელისუფლებასთან მიმართებაში“.