ვაკის პარკში სასტუმრო არ აშენდება, – განაცხადა თბილისის მერმა კახა კალაძემ სასტუმრო „ბუდაპეშტის“ მფლობელთან შეხვედრის შემდეგ.

„ვაკის პარკმა გაიმარჯვა და მინდა მოგილოცოთ. მინდა მივულოცო თბილისს და თბილისელებს. ჩვენ მოვახერხეთ შეთანხმების მიღწევა ინვესტორთან, რომ ამ კონკრეტულ ადგილზე, ვაკის პარკში არაფერი არ აშენდება. მე მინდა ვისარგებლო შემთხვევით და პირველ რიგში მინდა მადლობა გადავუხადო ყველა იმ ადამიანს, იმ აქტივისტს, ვინც პირველივე დღეებიდან ჩართული იყო და იცავდა ამ კონკრეტულ მწვანე სივრცეს. მინდა ასევე მადლობა გადავუხადო იმ რიგით თბილისელებს, რიგით ადამიანებს, ვისაც გული შესტკიოდა ამ მწვანე სივრცეზე და გვიცხადებდა მაქსიმალურ მხარდაჭერას და თანადგომას. მინდა ასევე მადლობა გადავუხადო ინვესტორს, რომ გადმოდგა შემხვედრი ნაბიჯები და შეთანხმება იქნა მიღწეული“, განაცხადა კახა კალაძემ და განმარტა, რომ ინვესტორისთვის არანაირი კომპენსაციის გადახდაზე საუბარი არ არის და ინვესტორსა და მერიას შორის შედგა შეთანხმება, რომ მოხდება ადგილმონაცვლეობა.