ვეტერანი და ახალგაზრდა სპორტსმენები უნდა შერიგდნენ, დათუნაშვილთან უნდა მოხდეს დალაპარაკება, მისი საქართველოდან წასვლა დაუშვებელია, რადგან ჩვენ დასაკარგი სპორტსმენები არ გვყავს, - განაცხადა საქართველოს პარლამენტის სპორტის კომიტეტის თავმჯდომარის პირველმა მოადგილემ, შოთა ხაბარელმა ჟურნალისტებთან საუბრისას.

მან აღნიშნა, რომ ჭიდაობის ფედერაციის პრეზიდენტის გეგა გეგეშიძის გირაოთი გათავისუფლებაზე გადაწყვეტილება სასამართლომ მიიღო და „არავითარი დაუსჯელობის სინდრომი არ არის“.

„ჩვენი ვალია, რომ სასამართლოს გადაწყვეტილებას ვცეთ პატივი. ახლა მთავარია, რომ სიტუაცია დამშვიდდეს, მოხდეს შერიგება, თუნდაც დათუნაშვილთან დალაპარაკება აუცილებელია იმიტომ, რომ ვეტერანი და ახალგაზრდა სპორტსმენების შერიგება უნდა მოხდეს, რადგან ჩვენ დასაკარგი სპორტსმენები არ გვყავს და მით უმეტეს ასეთი სპორტსმენის გადინება საქართველოდან დაუშვებელია. აქედან გამომდინარე, მთავარი ამოცანაა, რომ ყველაფერი დამშვიდდეს. რამეთუ ახლოს არის ოლიმპიური თამაშები და ეს უნდა იყოს მთელი საქართველოს ინტერესი“, განაცხადა შოთა ხაბარელმა და დასძინა, რომ გეგა გეგეშიძის თანამდებობაზე დარჩენის საკითხზე ჭიდაობის ფედერაცია იმსჯელებს.

„როგორც ვიცი, ჭიდაობის პრეზიდიუმის სხდომა იქნება და ამ საკითხის გარჩევა პრეზიდიუმზე მოხდება. გეგეშიძე უნდა დარჩეს თუ არა, ეს პრეზიდიუმის პრეროგატივაა. დაველოდოთ, დარწმუნებული ვარ, ახლო მომავალში ეს საკითხი გადაწყდება. სპორტის სამინისტრო ამ საკითხში აუცილებლად უნდა ჩაერთოს, რადგან პოლიტიკას სამინისტრო განსაზღვრავს. ვფიქრობ, ეს ყველაფერი დარეგულირდება. საჭიროა უფრო მჭიდრო ურთიერთობა, მოლაპარაკება, რომ ეს გამოვრიცხოთ და დათუნაშვილის საქართველოდან წასვლა არ მოხდეს.

გამოძიება ისევ მიმდინარეობს. ჯერ არ დამთავრებულა და გადაწყვეტილებას დაველოდოთ“, აღნიშნა ხაბარელმა.