ესპანეთმა, გერმანიამ, საფრანგეთმა და დიდმა ბრიტანეთმა გააფრთხილეს ვენესუელას პრეზიდენტი ნიკოლას მადურო, რომ თუკი 8 დღეში არჩევნებს არ დანიშნავს, ისინი ოფიციალურად აღიარებენ ოპოზიციას, იტყობინება BBC.

მადურო ზეწოლის ქვეშაა მას შემდეგ, რაც მისმა მეტოქემ, ეროვნული ასამბლეის სპიკერმა ხუან გუაიდომ საკუთარი თავი ოთხშაბათს „მოქმედ პრეზიდენტად“ გამოაცხადა. რადენიმე ქვეყანამ, მათ შორის შეერთებულმა შტატებმა, კანადამ და ლათინური ამერიკის ბევრმა სახელმწიფომ უკვე მხარი დაუჭირეს გუაიდოს, როგორც დროებით პრეზიდენტს.

შაბათს, რუსეთის მცდელობა, დაებლოკა გაეროს უშიშროების საბჭოს დისკუსია ვენესუელაში მიმდინარე პროცესებზე, წარუმატებელი აღმოჩნდა.

ვენესუელას ოპოზიციის ლიდერმა ხუან გუაიდომ განაცხადა, რომ პრეზიდენტ ნიკოლას მადუროს ამნისტიის საკითხს განიხილავს. თუკი იგი დათმობს ძალაუფლებას.

გუაიდომ ნტერვიუში თქვა, რომ იგი კრიზისის დასასრულებლად ყველა სექტორთან, მათ შორის სამხედროებთანაც ცდილობს კომუნიკაციის დამყარებას.

მადუროს, რომელიც ქვეყნის სათავეში 2013 წლიდან იმყოფება და გასული წლის მაისში მეორე ვადით აირჩიეს პრეზიდენტად და რომლის ინაუგურაციაც იანვრის პირველ ნახევარში შედგა, შეერთებულმა შტატებმა შემოსავლების ნაკადები დაუბლოკა. მან დიპლომატიური ურთიერთობები გაწყვიტა აშშ-სთან და პოსტის დათმობას არ აპირებს.

მადურო ამ დრომდე ინარჩუნებს სამხედროების და მოსახლეობის გარკვეული ნაწილის მხარდაჭერას, თუმცა საერთაშორისო საზოგადოება დაყოფილია იმის თაობაზე, ცნოს თუ არა მისი მთავრობა, განსაკუთრებით კი მას შემდეგ, რაც მსოფლიოს წამყვანმა სახელმწიფოებმა - ამერიკის შეერთებულმა შტატებმა, კანადამ, დიდმა ბრიტანეთმა, ასევე ათეულზე მეტმა ლათინური ამერიკის ქვეყანამ მხარი დროებით პრეზიდენტს, ხუან გუაიდოს დაუჭირა.

მაგრამ რუსეთმა გუაიდოსადმი უცხო სახელმწიფოების მხარდაჭერა დაგმო და განაცხადა, რომ ამით საერთაშორისო კანონი დაირღვა და ეს „პირდაპირი გზა იყო სისხლისღვრისაკენ“. მადუროს ასევე მხარს უჭერს ჩინეთი, მექსიკა და თურქეთი.