ამერიკის შეერთებულმა შტატებმა გააფრთხილა ვენესუელა, რომ ამერიკელი დიპლომატების ან ოპოზიციის ლიდერის, ხუან გუაიდოსადმი ნებისმიერ მუქარას „მნიშვნელოვანი პასუხი“ გაეცემა.

როგორც დონალდ ტრამპის მრჩეველმა ეროვნული უსაფრთხოების საკითხებში ჯონ ბოლტონმა განაცხადა, ნებისმიერი ამგვარი „დაშინება“ იქნებოდა „მძიმე თავდასხმა კანონის უზენაესობაზე“.

ვაშინგტონის მაღალი რანგის ოფიციალურ პირის გაფრთხილებას წინ უძღოდა ამერიკის შეერთებული შტატების და კიდევ 20-ზე მეტი ქვეყნის, მათ შორის ლათინური ამერიკის სახელმწიფოთა უმრავლესობის მხრიდან გუაიდოს, როგორც დროებით პრეზიდენტად აღიარება.

ამასობაში გუაიდომ ოთხშაბათს და შაბათს ანტი-სამთავრობო პროტესტისკენ მოუწოდა ვენესუელელებს და აშკარაა, რომ პოლიტიკური კრიზისი ნავთობით უმდიდრეს და ეკონომიკურად წელგატეხილ ქვეყანაში ახლა უკიდურესად დაძაბულ ნიშნულს უახლოვდება, რადგან ოპოზიციის უმთავრეს მოთხოვნას - პრეზიდენტმა მადურომ დათმოს ძალაუფება -ეს უკანასკნელი, რომელსაც არმიის და პოლიციის მხარდაჭერა აქვს, არ თანხმდება.

მადუროს, რომელიც ქვეყნის სათავეში 2013 წლიდან იმყოფება და გასული წლის მაისში სადავო არჩევნებში მეორე ვადით აირჩიეს პრეზიდენტად და რომლის ინაუგურაციაც იანვრის პირველ ნახევარში შედგა, შეერთებულმა შტატებმა შემოსავლების ნაკადები დაუბლოკა. მან დიპლომატიური ურთიერთობები გაწყვიტა აშშ-სთან და პოსტის დათმობას არ აპირებს.

ამასობაში, შაბათს, 26 იანვარს, ესპანეთმა, გერმანიამ, საფრანგეთმა და დიდმა ბრიტანეთმა გააფრთხილეს ვენესუელას პრეზიდენტი ნიკოლას მადურო, რომ თუკი 8 დღეში არჩევნებს არ დანიშნავს, ისინი ოფიციალურად აღიარებენ ოპოზიციას.

მაგრამ რუსეთმა გუაიდოსადმი უცხო სახელმწიფოების მხარდაჭერა დაგმო და განაცხადა, რომ ამით საერთაშორისო სამართალი დაირღვა და ეს „პირდაპირი გზა იყო სისხლისღვრისაკენ“. მადუროს ასევე მხარს უჭერს ჩინეთი, მექსიკა და თურქეთი.

ვენესუელას ოპოზიციის ლიდერმა ხუან გუაიდომ კი განაცხადა, რომ პრეზიდენტ ნიკოლას მადუროს ამნისტიის საკითხს განიხილავს, თუკი იგი დათმობს ძალაუფლებას.