„მე მგონია, რომ სწორედ საზოგადოების როლი ამ შემთხვევაში არის ის, რომ ჩვენ თვითონ არ შევუწყოთ ხელი ასეთი ტიპის ჩანაწერების არც გავრცელებას, მათ შორის ყურებაზე უარის თქმითაც“, - უთხრა ჟურნალისტებს საქართველოს რეგიონული განვითარებისა და ინფრასტრუქტურის მინისტრმა, მაია ცქიტიშვილმა სოციალურ ქსელში გავრცელებულ ფარულ ჩანაწერებზე საუბრისას.

„არ მოსულა, ჩემამდე არც ჩანაწერი არ მოსულა და მე მგონია, რომ სწორედ რომ საზოგადოების როლი ამ შემთხვევაში არის ის, რომ ჩვენ თვითონ არ შევუწყოთ ხელი ასეთი ტიპის ჩანაწერების არც გავრცელებას, მათ შორის ყურებაზე უარის თქმითაც და მგონია, როდესაც მთელი საზოგადოება ერთიანი იქნება, რომ ეს ყველასთვის არის ნამდვილად წითელი ხაზი, რომლის გადალახვაც არ არის შესაძლებელი არც ერთი ადამიანის, იქნება ეს პოლიტიკოსი, ქალბატონი თუ მამაკაცი, როდესაც ჩვენ ამაზე შევთანხმდებით, სრულიად საზოგადოება, დარწმუნებული ვარ, ეს უკვე აღარ გახდება მათ შორის არანაირად არც მანიპულირების იარაღი“, განაცხადა ცქიტიშვილმა და დაამატა, რომ „ფარულ ჩანაწერებთან დაკავშირებით შეფასება შეიძლება იყოს ერთი, ეს ყველა სტანდარტით მიუღებელია“, მათ შორის „ადამიანური, მორალური თვალსაზრისითაც“.

კითხვაზე, შესაძლებელია თუ არა ფარული ჩანაწერების გავრცელება ეკა ბესელიასა და მმართველი გუნდის სხვა წევრებს შორის დაპირისპირებას უკავშირდებოდეს, ცქიტიშვილი ამბობს, რომ ეს არა დაპირისპირება, არამედ გუნდში აზრთა სხვადასხვაობა იყო.

„მე არ შევაფასებდი ამას, როგორც ბესელიასა და გუნდის წევრების დაპირისპირებას. გუნდში ყოველთვის არის საკითხები, რომელზეც შესაძლოა, განსხვავებული შეხედულებები არსებობდეს. ვნახეთ, რომ გუნდში ორი დღის განმავლობაში ძალიან ხანგრძლივი შეხვედრა მიმდინარეობდა, რაც გვაძლევს საშუალებას, აზრთა სხვადასხვაობა შევაჯეროთ, გვქონდეს ნაყოფიერი დისკუსია“, განაცხადა მაია ცქიტიშვილმა.