„ერთიანი ნაციონალური მოძრაობის“ დეპუტატმა თინა ბოკუჩავამ განაცხადა, რომ ბიძინა ივანიშვილმა დაავალა სუს-ს, რომ პირადი ცხოვრების ამსახველი კადრები მათი მხარდამჭერებისთვის ვირუსულად გადაეგზავნა.

„ეს არის ბიძინა ივანიშვილის ხელწერა. მან მოახდინა პირადად ამის სანქცირება. ივანიშვილმა დაავალა სუს-ს რომ ეს კადრები ჩვენი მხარდამჭერებისთვის ვირუსულად გადაეგზავნათ“, განაცხადა ბოკუჩავამ.

მისი თქმით, მთავარი დამნაშავე და დამკვეთი ამ დანაშაულისა არის ის, რომელიც პრემიერ მინისტრობის დროს აშანტაჟებდა ადამიანებს პირადი ცხოვრების კადრების გავრცელებით.

„არ შევეგუებით, რომ ბიძინა ივანიშვილი უდანაშაულო ადამიანებს ყრის ციხეში, გიორგი გახარიას ტერმინოლოგიით რომ ვთქვათ“, აღნიშნა ბოკუჩავამ და დასძინა, რომ მტრის ხატის შექმნა „ერთიანი ნაციონალური მოძრაობისგან“ ეს არის ბიძინა ივანიშვილის ერთადერთი პოლიტიკა.

„ეს არის ბიძინა ივანიშვილის ხელწერა, რასაც ჩვენ დღეს ვხედავთ, რომ პირადად მან მოახდინა ასეთი დანაშაულის სანქცირება იმიტომ, რომ არავინ დაიჯერებს, რომ პირადი ცხოვრების ამსახველი კადრები გავრცელდა ბიძინა ივანიშვილის უშუალო მითითების გარეშე. სუს-მა ვირუსულად შემდგომ ათობით ჩვენს მხარდამჭერს და ძალიან ბევრ ადამიანს მთელი საქართველოს მასშტაბით, გაუგზავნა ეს კადრები, სწორედ იმიტომ, რომ ისინი ხვდებოდნენ, ვინმე უნდა დაესაჯათ, მაგრამ ცხადია, ისინი ვერ დასჯიან ადამიანს, ვინც ეს დაკვეთა გააკეთა, იმიტომ, რომ ეს ადამიანი არის თავად ამ ქვეყნის მმართველი ბიძინა ივანიშვილი. ეს არ არის პირველი შემთხვევა, როცა ბიძინა ივანიშვილს გადააქვს ისრები სხვაზე და ეს სხვა არის „ერთიანი ნაციონალური მოძრაობა“. მტრის ხატის შექმნა „ერთიანი ნაციონალური მოძრაობისგან“ ეს არის ბიძინა ივანიშვილის ერთადერთი პოლიტიკა, მაგრამ თქვენ ეს არ გამოგივათ. ეს არის დანაშაული, ძალიან მძიმე დანაშაული, რაც ჩაიდინა თავად ივანიშვილმა და რაც შემდგომ დაავალა სუს-ს და სუს-ის მაღალჩინოსნებს, რომ დიახ, ათეულობით ჩვენი მხარდამჭერისთვის გუშინ გადაეგზავნათ ეს კადრები“, განაცხადა თინა ბოკუჩავამ.