საქართველოს ყოფილი პრეზიდენტი მიხეილ სააკაშვილი „ფეისბუქზე“ შეერთებული შტატების ქალაქ მაიამის პორტში გადაღებულ ვიდეოს აქვეყნებს და ამბობს, რომ 2012 წელს მან გააფორმა მემორანდუმი მსოფლიოს უდიდეს საკრუიზო კომპანიასთან და ბათუმში შავი ზღვის როიალ კარიბიანის ისეთივე ცენტრი უნდა აშენებულიყო, როგორიც არის მაიამიში, თუმცა ეს პროექტი ივანიშვილმა შეაჩერა, რითაც ბათუმს ასეულობით მილიონი აშშ დოლარის შემოსავალი დაუკარგა.

„2012 წელს ჩვენ გავაფორმეთ მემორანდუმი მსოფლიოს უდიდეს საკრუიზო კომპანიასთან და ბათუმში ვაშენებდით შავი ზღვის როიალ კარიბიანის ისეთივე ცენტრს, როგორიც არის მაიამიში. ეს ნიშნავდა ბათუმში დამატებით ნახევარი მილიონი მდიდარი ამერიკელი და ევროპელი ტურისტის შემოყვანას ყოველწლიურად.

ივანიშვილმა პროექტი „არააქტუალურად“ გამოაცხადა და სამაგიეროდ ახლა იმავე ადგილზე აშენებს ქიმიური ნარჩენების პორტს.

ახლა ოლიგარქი ულამაზესი ლაინერების ნაცვლად ეკა ბესელიას ყურებას გვთავაზობს. მართლა WTF!“, წერს მიხეილ სააკშვილი „ფეისბუქზე“, რომელსაც თან ახლავს ვიდეო, სადაც იგი ამბობს:

„ბათუმში შენდებოდა ტერმინალი და ყოველდღე ჩამოდგებოდა რამდენიმე თვის განმავლობაში წლიწადში ესეთი გემები, რომელიც ღამე დარჩებოდა ბათუმში და თითო ტურისტი ხარჯავდა 300-დან 500 დოლარამდე. უკვე კონტრაქტიც გაფორმებული იყო, მიწაც გამოყოფილი იყო, ყველაფერი შეთანხმებული იყო და მერე 2012-ში მოვიდნენ ეს უდღეურები და გააჩერეს ეს პროექტი და ბათუმი დატოვეს დამატებით მრვაალასეულმილიონიანი დოლარის შემოსავლის გარეშე, იმის გამო, რომ ჩვენ ჯინაზე გააჩერეს ეს პროექტი და ახლა ვუყურებ მაიამიში და ვსკდები გულზე, რომ ასეთი რაღაცა გვქონდა განზრახული და ყველაფერი ჩაგვეშალა“.