თბილისის მერმა, პარტია „ქართული ოცნება - დემოკრატიული საქართველოს“ გენერალურმა მდივანმა კახა კალაძემ განაცხადა, რომ თუ რომელიმე კონკრეტული პიროვნება „ქართული ოცნების“ დატოვების გადაწყვეტილებას მიიღებს, ეს პრობლემა არ იქნება და პარტია მაინც უმრავლესობით განაგრძობს მოღვაწეობას და იმ დაპირებების შესრულებას, რომელიც გაცემული აქვს ხალხის წინაშე.

„როდესაც კოალიციური მთავრობა იყო, მაშინაც ბევრი კითხვა ისმოდა, რომ აი, რა მოხდება, თუ კოალიცია დაიშლება და „ქართული ოცნება“ ცალკე გამოვა. მაშინაც ვამბობდი, რომ ეს არის პოლიტიკური და დემოკრატიული პროცესების ნაწილი, ყველა ქვეყანაში ხდება ანალოგიური - იშლება, იკრიბება და იქმნება კოალიციები, შესაბამისად, მოხდა ისე, რომ დაიშალა კოალიცია და „ქართულმა ოცნებამ“ მიიღო ჩვენი ქვეყნის მოსახლეობის ხმათა უმრავლესობა, ყველა არჩევნებში, რომელიც დღემდე ჩატარდა.

რაც შეეხება უმრავლესობიდან თუ გავა ვინმე, დღეის მდგომარეობით, არ არსებობს საშიშროება, რომ ვინმემ დატოვოს პარტია, თუმცა თუ რომელიმე კონკრეტული პიროვნება ამ გადაწყვეტილებას მიიღებს, მე აქაც ვერ ვხედავ პრობლემას. პარტია „ქართული ოცნება“ მაინც უმრავლესობით გააგრძელებს მოღვაწეობას და იმ დაპირებების შესრულებას, რომელიც გაცემული აქვს ხალხის წინაშე“, განაცხადა კახა კალაძემ ჟურნალისტებთან თემის კომენტირებისას.