„როგორც თავიდანვე, ეს საქმე იყო უსამართლობითა და სიბილწით შეკერილი", აღნიშნულ განცხადებას ჭყონდიდის მიტროპოლიტი ე.წ. ციანიდის საქმესთან დაკავშირებით აკეთებს.

მეუფე პეტრე ცაავა აქციების დაწყების შესახებ აღნიშნულ საქმეზე მსჯავრდებული დეკანოზის, გიორგი მამალაძის ოჯახის წევრების გადაწყვეტილებას ეხმაურება და ამბობს, რომ შეუძლებელია, „ქართველმა ერმა არ მოინდომოს სიმართლის გარკვევა".

ჭყონდიდის მიტროპოლიტი მიიჩნევს, რომ საპატრიარქოში არიან სასულიერო პირებიც და ერისკაცებიც, რომელთაც „ღმერთის არ ეშინიათ და ხალხის არ სცხვენიათ", თუმცა, ქართველი აუცლებლად მოითხოვს სიმართლის დადგენას ე.წ. ციანიდის საქმეზე.

„როგორც თავიდანვე, ეს საქმე იყო უსამართლობითა და სიბილწით შეკერილი და არ მოინდომეს სამართლიანობა და სიმართლე, არამედ აირჩიეს სიცრუის გზა. დღემდე ამ სიცრუით ვლენ, სამწუხაროდ, მავანნი. ამიტომ შეუძლებელია, ქართველმა ერმა არ მოინდომოს სიმართლის გარკვევა.

როგორც სახარების თანახმად, როგორც უფალი იესო ქრისტე მოიხსენიებს მსაჯულს, რომ ღმერთის არა ეშინოდაო და ხალხის არა რცხვენოდაო. აი, გამოჩნდნენ ადამიანები, მათ შორის, საპატრიარქოში სასულიერო პირების თუ ერისკაცების სახით, რომელთაც ღმერთის არ ეშინიათ და სირცხვილის გრძნობა არ გააჩნიათ, მაგრამ ქართველი ერი აუცილებლად მოითხოვს, რომ სიმართლე დადგინდეს", აცხადებს ჭყონდიდის მიტროპოლიტი „რუსთავი 2"-თან საუბრისას.