„მთავარი არის პირველწყარო, საიდანაც გავრცელდა ეს ინფორმაცია, ზუსტად ეს უნდა გამოვლინდეს. რაც შეეხება გავრცელებას, ამ კუთხით არის პროგრესი - გამავრცელებლების კუთხით, თუმცა, რაც შეეხება წყაროს ფარული ჩანაწერის, ასე ვთქვათ, გავრცელების, ეს არის ზუსტად მთავარი დასადგენი", აღნიშნული განცხადება ფარულ ჩანაწერებთან დაკავშირებით პარლამენტის თავმჯდომარემ, ირაკლი კობახიძემ გააკეთა.

მისი თქმით, ყველა დეტალის დასადგენად, სამართალდამცავ ორგანოებთან მუდმივი კომუნიკაცია აქვს.

„პირველ რიგში, სწორედ ჩვენი პოლიტიკური ძალის ინტერესებშია ის, რომ ბოლომდე გაიხსნას ეს საქმე. მე მაქვს ყოველდღიური კავშირი სამართალდამცავ ორგანოებთან. რაც შეეხება პირველ დღეებს, იქ მიდიოდა მუშაობა იმაზე, რომ დადგენილიყო თუ რამდენად შეესაბამებოდა რეალობას ერთი დეპუტატის განცხადება, ამასთან დაკავშირებითაც არის კითხვის ნიშნები.... რაც შეეხება ჩემს ჩართულობას ამ პროცესში, ყოველდღიური ჩართულობა მქონდა სამართალდამცავ ორგანოებთან, შესაბამის მინისტრთან, მინისტრებთან და აქედან გამომდინარე, არის ჩემი ჩართულობა ყოველდღიურ რეჟიმში უზრუნველყოფილი იმისთვის, უზრუნველყოფილი იყოს საქმის ბოლომდე გამოძიება", უთხრა ჟურნალისტებს ირაკლი კობახიძემ.