ე.წ. ციანიდის საქმეზე მსჯავრდებული სასულიერო პირის, დეკანოზ გიორგი მამალაძის ოჯახის წევრები საპატრიარქოს მიმდებარე ტერიტორიაზე საპროტესტო აქციას მართავენ.

აქციის მონაწილეების თქმით, მათ ორი ძირითადი მოთხოვნა აქვთ - მათგან ერთი დეკანოზის ზიარებას, ხოლო მეორე საპატრიარქოს მიერ ე.წ. ციანიდის საქმის განხილვის შესახებ მოთხოვნას შეეხება. 

სასულიერო პირის ძმა თორნიკე მამალაძე აცხადებს, რომ აქციის გამართვამდე მან სასჯელაღსრულების დაწესებულებაში საკუთარი ძმა მოინახულა, რომელმაც მას სთხოვა, რომ საპროტესტო აქცია არ გაემართა.

„უკვე ორი წელია, რაც ჩემი ძმა, დეკანოზი გიორგი მამალაძე საპატრიარქოს გარკვეული დაჯგუფებიდან, მთავრობის ხელშეწყობით უკანონო პატიმრობაში იმყოფება. მისი ჯანმრთელობის მდგომარეობა დღითიდღე უარესდება. დღეს შევხვდი ჩემს ძმას. ჩემი ძმის პოზიცია იყო ამ აქციასთან დაკავშირებით, ასე რომ ვთქვათ ეს ეხება ეკლესიას და ჩემი ძმა სასულიერო პირია და იგი ცდილობდა გადაერწმუნებინა ჩემთვის ეს აქცია. მაგრამ მე ვარ ძმა, მე ვარ ოჯახის წევრი, მას ჰყავს სამი მცირეწლოვანი შვილი და მე ვფიქრობ მის ჯანმრთელობაზე, მის სიცოცხლეზე და ამიტომ გადავწყვიტე ეს პოზიცია. მე ამ ორი წლის განმავლობაში ვცდილობდი ყოველთვის საქართველოს საპატრიარქოსთან კომუნიკაცია დამემყარებინა და მომეგვარებინა, ასე რომ ვთქვათ შიგნიდან თავიანთი პრობლემა მაგრამ სამწუხაროდ, ამ ორი წლის მანძილზე არანაირი დადებითი ნაბიჯი არ გადადგმულა", უთხრა თორნიკე მამალაძემ „რუსთავი 2"-თან საუბრისას.

აქციის მონაწილეებს საპატრიარქოდან ჯერჯერობით არავინ გამოხმაურებია.