"ხვალ მე ვეწვევი ევროკავშირის სადამკვირვებლო მისიას და ადმინისტრაციულ საზღვარს სეპარატისტულ სამხრეთ ოსეთთან, რათა კიდევ ერთხელ შევაფასო სიტუაცია საზღვრის დემარკაციის ნიშნების აღმართვასთან დაკავშირებით", - ამის შესახებ ევროპული საბჭოს პრეზიდენტმა დონალდ ტუსკმა საქართველოს პრეზიდენტ გიორგი მარგველაშვილთან ერთად გამართულ პრესკონფერენციაზე განაცხადა.
დოლანდ ტუსკმა 13 ივნისს თბილისში სტიქიის დროს დაღუპულების ოჯახებს მიუსამძიმრა. "მე ნამდვილად მოხარული ვარ, რომ კიდევ ერთხელ ვეწვიე თბილისს. პრეზიდენტმა მარგველაშვილმა ჩვენი უკანასკნელი შეხვედრის დროს მომიწვია თბილისში და მოხარული ვარ, რომ მისი მოწვევა მივიღე და მე ფაქტობრივად საბერძნეთის დრამატული სიტუაციიდან გამომდინარე მომიწია ჩემი ვიზიტის გადადება, რომელიც ადრე იყო დაგეგმილი. მადლობა მოთმინებისთვის. ღრმა მწუხარება მინდა გამოვთქვა იმ ადამიანებისა და ოჯახების მიმართ, რომლებიც შეეწირნენ 13 ივნისს თბილისში მომხდარ წყალდიდობას. მინდა გამოვხატო ჩემი სოლიდარობა და ხაზი გავუსვა, რომ ჩვენ ვიქნებით თქვენს გვერდით. საქართველომ განსაზღვრა თავისი გზა, როგორც მჭიდროდ ასოცირებულმა პარტნიორმა ევროკავშირთან და ჩვენი ორმხრივი ურთიერთობებიც ძლიერია და კიდევ უფრო ვითარდება. საქართველო რეალური ლიდერია აღმოსავლეთ პარტნიორობაში. ეს არ არის კომპლიმენტი, ეს არის ფაქტი. ასოცირების ხელშეკრულების განხორციელება, რომელიც ჩვენ დავიწყეთ გასულ სექტემბერს, ითამაშებს უმთავრეს როლს ჩვენი პარტნიორობის გარღმავებაში", - განაცხადა დონალდ ტუსკმა.
მისი თქმით, აუცილებლად მოხდება პოზიტიური ცვლილებები, რომელიც საქართველოს საზოგადოების სასარგებლოდ იმუშავებს. "ერთ-ერთი მაგალითი გახლავთ ვიზალიბერალიზაციის რეჟიმი. პროგრესი უკვე მიღწეულია და ჩვენ ძალზე ამბიციური დღის წესრიგი დავისახეთ, რათა დავასრულოთ აღნიშნული პროცესი. ჩვენი მოლაპარაკების განმავლობაში განვიხილეთ რთული რეგიონული და საერთაშორისო კონტექსტი. ევროკავშირი განაგრძობს საქართველოს ტერიტორიული მთლიანობისა და სუვერენობის მხარდაჭერას. ჩვენ გვინდა მაქსიმალურად ავამუშაოთ დიპლომატიური ძალისხმევა, რათა მიღწეულ იქნას გადაწყვეტილება. ხვალ მე ვეწვევი ევროკავშირის სადამკვირვებლო მისიას და ადმინისტრაციულ საზღვარს სეპარატისტულ სამხრეთ ოსეთთან, რათა კიდევ ერთხელ შევაფასო სიტუაცია საზღვრის დემარკაციის ნიშნების აღმართვასთან დაკავშირებით. ნება მომეცით ხაზი გავუსვა და კიდევ ერთხელ დავადასტურო, რომ მე საქართველოში ვიმყოფები იმიტომ, რომ თქვენი ქვეყანა ძალიან მნიშვნელოვანია ჩვენთვის", - განაცხადა დონალდ ტუსკმა.
დონალდ ტუსკი მიიჩნევს, რომ ევროკავშირის ქვეყნებში უვიზო მიმოსვლის ამოქმედებისთვის საქართველოს დამატებითი რეფორმების გატარება სჭირდება.
როგორც დონალდ ტუსკმა საქართველოს პრეზიდენტ გიორგი მარგველაშვილთან შეხვედრის დროს განაცხადა, საქართველოს ევროკავშირში გაწევრიანების დიდი სურვილი გააჩნია.
"თუმცა ჩემი სურვილი არ არის გარანტია იმ დროს, როდესაც საკითხი დგება ვიზალიბერალიზაციის თემაზე. საქართველო კარგ პოზიციაზე დგას. როდესაც თავისუფალი მობილურობის თვალსაზრისით არის საუბარი, ევროკომისიის პრეზიდენტი ჟან-კლოდ იუნკერი და მე ძალზე ამბიციურად ვუდგებით ამ თემას. საქართველო ამჟამად ახორციელებს რეფორმებს, რომელსაც მივესალმებით, თუმცა უვიზო რეჟიმისთვის დამატებითი რეფორმებია საჭირო. საქართველომ უნდა განაგრძოს აქტიური მუშაობა კორუფციის წინააღმდეგ ბრძოლის, მიგრაციის, ნარკოტიკების წინააღმდეგ ბრძოლის, ადამიანთა ტრეფიკინგის თვალსაზრისით. ეს გახლავთ ჩვენი ოფიციალური პოზიცია და დარწმუნებული ვარ, საქართველო მზად გახლავთ და ამბიციური დღის წესრიგის თვალსაზრისით ვფიქრობ, რომ როდესაც საქმე მივა ამ ეტაპამდე, თქვენი მზაობა იქნება მაღალი, იმისთვის, რომ დავაჩქაროთ მოვლენათა მიმდინარეობა", - განცხადა დონალდ ტუსკმა.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.