წყალტუბოს მუნიციპალიტეტის მერი გრიგოლ იოსელიანი შპს „რენეგეიდ თი"- ს წარმომადგენლებს შეხვდა და სოფელ ოფურჩხეთში ჩაის მინი ფაბრიკის ფუნქციონირების საკითხი და გაშენებული ჩაის პლანტაციებში არსებული მდგომარეობა განიხილა.

შეხვედრას მერის პირველი მოადგილე ზურაბ მაისურაძე ესწრებოდა. ადგილობრივი თვითმმართველობის პირველმა პირებმა ინვესტორებს, ჰანეს საარპუსა და პრიტ ლავტს მხარდაჭერა გამოუცხადეს და სოფელში გზის რეაბილიტაციის შესახებ ისაუბრეს.

სოფელ ოფურჩხეთში მიტოვებული ჩაის პლანტაციების რეაბილიტაცია პროგრამა „ქართული ჩაის“ ფარგლებში 2017 წელს დაიწყო. ამჟამად ჩაის პლანტაციები სოფელ ოფურჩხეთში 17 ჰექტარზე, ხოლო სოფელ გუმათში 10 ჰექტარზეა გაშენებული. სოფელ ოფურჩხეთში ფუნქციონირებს ჩაის გადასამუშავებელი მინი ფაბრიკა, სადაც ამჟამად 30 ადგილობრივია დასაქმებული.

„ქართული ჩაი იმსახურებს აღორძინებას, ამ მიმართულებით წყალტუბოს მუნიციპალიტეტში ესტონელი ინვესტორები ეფექტურად მუშაობენ, ათეული წლების განმავლობაში მიტოვებულ ჩაის პლანტაციებს კვლავ მიუბრუნდა მოსახლეობა, გაჩნდა ახალი სამუშაო ადგილები და რაც მთავარია, დაიწყო თავისი გემოვნური თვისებებით ცნობილი ოფურჩხეთის ჩაის წარმოება", აღნიშნა მუნიციპალიტეტის მერმა.

სოფელ ოფურჩხეთში ჩაის პლანტაციების აღდგენისა და ჩაის ფაბრიკის გახსნის პარალელურად, გახშირდა უცხოელი ტურისტების მისვლის ფაქტები, შესაძლოა, სოფელში მალე გასტრონომული ტურებიც მოეწყოს.

ინფორმაციას წყალტუბოს მუნიციპალიტეტის მერიის პრესსამსახური ავრცელებს.