„მე ვიყავი ის ადამიანი, ვისაც თავად „ოცნება" მდებდა ბრალს, რომ ნამეტანი ლმობიერი ხარ „ნაცონალებთან" ურთიერთობაშიო პარლამენტის თავმჯდომარეობისას, აღნიშნული განცხადება „TV პირველზე“ „დიანა ტრაპაიძის დღის ამბებში" სტუმრობისას პარლამენტის ყოფილმა თავმჯდომარემ, ამჟამად კი, „შენების მოძრაობის“ ლიდერმა დავით უსუფაშვილმა გააკეთა.

მისი თქმით, „მე ვცდილობდი და დღესაც ვცდილობ და ხვალაც შევეცდები, რომ ქვეყანა გამთლიანდეს და მტრობა შეიცვალოს კონკურენციით. ანუ ერთმანეთის განადგურებისკენ კი არ გვქონდეს მომართული იარაღები, არამედ ერთმანეთის შეჯიბრზე, ვინ უკეთესია".

„უნდა გავმიჯნოთ ერთმანეთისგან პოლიტიკური პრობლემა და სამართლებრივი პრობლემა. მე, სიმართლე გითხრათ, არ მესმის დღემდე, რატომ არ მიდიან „ნაციონალური მოძრაობის" და „ევროპული საქართველოს" ლიდერები - ერთი 100 კაცი პროკურატურაში ხელბორკილებით და რატომ არ ამბობენ, ჩვენ ჩვენით მოვედით - და 48-საათიანი წინასწარი პატიმრობა რომაა სასამართლომდე, აგერ ჩვენ 48 საათი ვდგევართ ხელბორკილშეკრული, გამოდით, დაგვდეთ ბრალი ვისაც რაში მიგვიძღვის, ჩაგვსვით და გაგვასამართლეთ. თუ 48 საათში ამას არ აკეთებ, მაშინ კეთილი იქნებე, შეეშვი ამ პოლიტიკურ სპეკულაციებს და ვითომ გულზე მჯიღის ცემას - შენ სისხლიანი ხელები გაქვს, შენ ფული გაქვს მოპარული. აგერ, პარლამენტის თავმჯდომარე გამოვიდა და „კაბელების საქმეზე" უთქვამს ხო? ვითომ, ვიღაცამ დიდი ფული წაიღოვო, ესენი უდანაშაულოები იყვნენო. ახლა ის ვიღაცა ვინ არის, იმაზე უნდა ვიმარჩიელოთ. კეთილი ვინებოთ, ეს ხალხი ან გავასამართლოთ, ან კრიმინალური ბრალდებები მოვხსნათ", განაცხადა დავით უსუფაშვილმა.