„მიგვაჩნია, რომ სასამართლო სისტემის გარშემო დღეს მიმდინარე ღია პროცესი არის ჯანსაღი, რადგან შედეგად უნდა მივიღოთ გავლენებისგან თავისუფალი სასამართლო ხელისუფლება. პარლამენტის მიერ შემუშავებული კრიტერიუმების გათვალისწინებით, მხარს დავუჭერთ არა გავლენათა ჯგუფებს, არამედ იმ კონკრეტულ პიროვნებებს, რომლებიც ზემოაღნიშნულ კრიტერიუმებს დააკმაყოფილებენ,“, აცხადებენ ფრაქცია „ქართული ოცნება - რეგიონების განვითარებისთვის“ წევრი მაჟორიტარი დეპუტატები.

„საქართველოს უახლოეს ისტორიაში, სხვადასხვა პოლიტიკური თუ არაპოლიტიკური ჯგუფები ცდილობდნენ და ახლაც ცდილობენ გავლენების მოპოვებას სასამართლო სისტემაზე.

დამოუკიდებელი და თავისუფალი სასამართლო ხელისუფლება არის ჩვენი ქვეყნის დემოკრატიული განვითარებისა და ეკონომიკური წინსვლის ქვაკუთხედი და სამართლიანი საზოგადოების ჩამოყალიბების მთავარი წინაპირობა.

შესაბამისად, მნიშვნელოვანია, რომ ბოლო 6 წელიწადში, ქართული სასამართლოს რეიტინგი, ანგარიშგასაწევი საერთაშორისო შეფასებების მიხედვით, ზრდის პოზიტიური ტენდენციით ხასიათდება.

აქვე, იმასაც აღვნიშნავთ, რომ ევროპის საუკეთესო ოცეულში ქართული სასამართლოს მიერ დაკავებული მე-18 პოზიციით არ უნდა დავკმაყოფილდეთ და ამოცანად ამ ტენდენციის მუდმივი გაუმჯობესება დავისახოთ.

მიგვაჩნია, რომ სასამართლო სისტემის გარშემო დღეს მიმდინარე ღია პროცესი არის ჯანსაღი, რადგან შედეგად უნდა მივიღოთ გავლენებისგან თავისუფალი სასამართლო ხელისუფლება.

ჩვენ, მსოფლიო სასამართლო სისტემების საუკეთესო პრაქტიკაზე დაყრდნობით და პარლამენტის მიერ შემუშავებული კრიტერიუმების გათვალისწინებით, მხარს დავუჭერთ არა გავლენათა ჯგუფებს, არამედ იმ კონკრეტულ პიროვნებებს, რომლებიც ზემოაღნიშნულ კრიტერიუმებს დააკმაყოფილებენ, რაც სრულად დამოუკიდებელ და თავისუფალ სასამართლო სისტემამდე მიგვიყვანს“, ნათქვამია ფრაქცია „ქართული ოცნება - რეგიონების განვითარებისთვის“ მიერ გავრცელებულ განცხადებაში, რომელსაც ხელს აწერენ დეპუტატები: კახაბერ ოქრიაშვილი, გოგი მეშველიანი, ენზელ მკოიანი, კობა ლურსმანაშვილი, გურამ მაჭარაშვილი და ანზორ ბოლქვაძე.