„ევროპის ცენტრში ჩვენ მოგვიწყვეს იაფფასიანი შოუ, აქ არის ჩამოსული სუს-ის ჯგუფი. იმედია ბელგიის პოლიცია გაესაუბრება ამ ხალხს და მეროედ არ შემოუშვებს“, განაცხადა საქართველოს ყოფილმა პრეზიდენტმა მიხეილ სააკაშვილმა ლიეჟში, სადაც ის ამ წუთებში ქართველ ემიგრანტებს სიტყვით მიმართავს.

„იქით არის ბოღმა, ტყუილი. აქეთ არის სიმართლე. იქით არის ის ხალხი, ვინც დაკეტა ამერიკული უნივერსიტეტი და მიაშენა ლოჟები. ეს არის მთავრობა, რომელმაც გააუქმა გამოცდები. იქით არის სიბნელე, აქეთ სინათლე. იქით არის ბოროტება და აქეთ არის სიკეთე. სიკეთე აუცილებლად დაამარცხებს ბოროტებას. ჩვენ აუცილებლად გავიმარჯვებთ“, განაცხადა მიხეილ სააკაშვილმა.

სააკაშვილმა აღნიშნა, რომ საქართველო დაცლილია და თუ ასე გაგრძელდა 1-2 წელიწადში ქვეყანა იქნება მხოლოდ პენსიონერების საზოგადოება.

მან დასძინა, რომ „ამ გველეშაპის [ივანიშვილის] ჩამოშორება უნდა მოხდეს, რომელიც მომჯდარია საქართველოს“ და მომავალში ოლიგარქატი არ უნდა მიეკაროს ხელისუფლებას.

სააკაშვილმა ემიგრანტებს ჰკითხა, არიან თუ არა მზად, რომ დღეს ყველა ერთად წავიდეს საქართველოში და თავადვე უპასუხა. „დღეს არ არის სიტუაცია მზად, მაგრამ უახლოეს კვირებში და თვეებში ჩვენ უნდა მოვამზადოთ ეს სიტუაცია. ყოველდღიურად ჩვენ გვართმევენ საქართველოს“, აღნიშნა სააკაშვილმა.

სააკაშვილის დარბაზში სიტყვით გამოსვლისას ადგილი ჰქონდა მცირე ინციდენტს. მოძრაობა „თეთრების“ ლიდერი და პრეზიდენტობის ყოფილი კანდიდატი თემურ შაშიაშვილი  ცდილობდა თავისი პოზიცია დაეფიქსირებინა, რისი საშუალებაც მას „ერთად სახლში“ ორგანიზატორებმა არ მისცეს და იმერეთის ყოფილი გუბერნატორი დარბაზიდან ძალის გამოყენებით გაიყვანეს.