თბილისში მომდევნო კვირიდან 13 ქუჩის გზის სარეაბილიტაციო სამუშაოები დაიწყება, დანარჩენი 37-მდე ქუჩის სარეაბილიტაციო სამუშაოები ეტაპობრივად დაიწყება,-ამის შესახებ თბილისის მერიაში გამართულ ბრიფინგზე გახდა ცნობილი.


"დედაქალაქის მასშტაბით 50-მდე ქუჩის სარეაბილიტაციო სამუშაოები იწყება. საგზაო ინფრასტრუქტურის კაპიტალური შეკეთების მიზნით 18 მლნ ლარის ღირებულების ტენდერი უკვე დასრულებულია. 13 ქუჩის რეაბილიტაცია მომდევნო კვირაში, დანარჩენი ქუჩების სარეაბილიტაციო სამუშაოები კი ეტაპობრივად დაიწყება.


ჩატარებული ტენდერების მიხედვით, მტკვრის მარჯვენა სანაპიროზე მდებარე ქუჩების კაპიტალურ შეკეთებას კომპანია "ბლექ სი გრუპი" აწარმოებს, რომელთა სამუშაოების ღირებულება დაახლოებით 6 მილიონ ლარს შეადგენს. მტკვრის მარცხენა სანაპიროზე მდებარე ქუჩების კაპიტალურ შეკეთებას კი ახორციელებს ტენდერში გამარჯვებული კომპანია "არენამშენი". სამუშაოების ღირებულება 5 500 000 ლარია.


უახლოეს 5 დღეში საგზაო სამუშაოები დაიწყება თბილისიდან კოჯრის მიმართულებით გზაზე. ასევე დაგეგმილია კოჯრის ცენტრალური მოედნის კატიპალურად შეკეთება. ამ დროისათვის დედაქალაქის მასშტაბით საგზაო სამუშაოები 11 ქუჩაზე ხორციელდება.


თბილისის მერიის კეთილმოწყობის საქალაქო სამსახურმა და რაიონულმა გამგეობებმა 2015 წელს კაპიტალური საგზაო სამუშაოები განახორციელა 384 000 მ2  ფართის გზაზე, ხოლო ორმოული შეკეთება ჩაუტარდა 300 000  მ2 ფართობს. გეგმის ფარგლებში სულ 6 თვის მონაცემებით დედაქალაქის ბიუჯეტიდან საგზაო მიმართულებაზე დაიხარჯა დაახლოებით 27, 4 მლნ ლარი. სულ დედაქალაქის მასშტაბით კაპიტალური რეაბილიტაცია ჩაუტარდა 50-მდე ქუჩას",-აცხადებენ თბილისის მერიაში.