ზესტაფონის მერი კახაბერ მახათაძე თანამდებობას ტოვებს. მუნიციპალიტეტის მერიის ადმინისტრაციული სამსახურის უფროსის, ეკატერინე დუგლაძის განცხადებით, მერთან ერთად, პოსტიდან წასვლის შესახებ განცხადებები უკვე დაწერეს მერის მეორე მოადგილემ და ინფრასტრუქტურის სამსახურის უფროსმა.

GUARDIAN.GE-სთან საუბრისას ეკატერინე დუგლაძემ მის მიერ თანამდებობის დატოვების შესახებ მედიაში გავრცელებული ინფორმაცია უარყო, თუმცა თანამდებობიდან წასვლა დაანონსა.

ადმინისტრაციული სამსახურის უფროსი ამბობს, რომ კახაბერ მახათაძის გადადგომის შემდეგ, „დაწყებული ადმინისტრაციის უფროსიდან და მდივნიდან, რიგითი თანამშრომლით დამთავრებული" მუნიციპალიტეტის მერიაში მუშაობას არავინ აპირებს.

„ოფიციალურად დღეს დაწერა განცხადება ბ-მა კახაბერმა თანამდებობიდან გადადგომის შესახებ. თანამდებობიდან გადადგა მისი მეორე მოადგილე ელგუჯა კვეტენაძე, რომელიც რამდენიმე თვის წინ დაინიშნა აღნიშნულ თანამდებობაზე. დღეს თანამდებობიდან გადადგომის შესახებ განცხადება გააკეთა მერიის ინფრასტრუქტურის უფროსმა, დავით აბულაძემ.

რაც შეეხება გუნდის დანარჩენ წევრებს, იმის გამო, რომ მერის პირველ მოადგილეს სასწრაფო ოპერაცია გაუკეთეს და კლინიკაშია, მუნიციპალიტეტში მთელი რიგი სამუშაოებია დასასრულებელი, ამიტომ მე ვრჩები თანამდებობაზე აღნიშნული საქმეების დასრულებამდე, რის შემდეგაც გუნდის ყველა წევრი - დაწყებული მდივნიდან, დაწყებული ადმინისტრაციის სამსახურის უფროსიდან, რიგითი თანამშრომლით დამთავრებული, არ ვაპირებთ ვიმუშაოთ მუნიციპალიტეტში", განუცხადა GUARDIAN.GE-ს ეკატერინე დუგლაძემ და დასძინა, რომ გადადგომის შესახებ განცხადებას ოფიციალურად გააკეთებს.

მისივე ინფორმაციით, ზესტაფონის მუნიციპალიტეტის მერის მოავალეობას ხვალიდან მერის მეორე მოადგილე - ნუგზარ ფერაძე შეასრულებს, რომელიც დუგლაძის თქმითვე, „გუშინ დანიშნულია".