საქართველოს ყოფილ პრეზიდენტთან მიხეილ სააკაშვილთან შეხვედრას არ გამორიცხავს ეროვნული ფორუმის ერთ-ერთი დამფუძნებელი და ყოფილი კოალიცია „ქართული ოცნების“ ერთ-ერთი ლიდერი გუბაზ სანიკიძე, რომელმაც მისი სააკაშვილთან შეხვედრის შესახებ გავრცელებული ინფორმაცია კატეგორიულად უარყო და ტელეკომპანია „კავკასიას“ პირდაპირ ეთერში, გადაცემა „სპექტრში“ სტუმრობისას განაცხადა, რომ „სააკაშვილს ბოლოჯერ 2004 წელს შეხვდა“, თუმცა მისი თქმით, „პოლიტიკაში ქალწულობა არ არსებობს“ და მომავალში არც მასთან და არც ბიძინა ივანიშვილთან შეხვედრას არ გამორიცხავს.

„ძალიან ბევრმა მითხრა ასეთი რამე, რომ მართლა შეხვდიო მიშასო? სოსო შატბერაშვილო. ჩემო სოსო, ჩემო ძვირფასო ადამიანო, ძალიან დიდ პატივს გცემ და იმედი მაქვს, რომ ასე გავაგრძელებთ. სანამ რაიმე განცხადებას გააკეთებ, სულ თავისუფლად შეგეძლო გადაგემოწმებინა ჩემთან, მართლა შევხვდი მიშა სააკაშვილს თუ არ შევხვდი. მიშა სააკაშვილს მე შევხვდი 2004 წელს ბოლოჯერ. ამის შემდეგ მე მიშა სააკაშვილი აღარ მინახია. ეს ადვილად დასტურდება. წელიწადნახევარი მე ქვეყნიდან აღარ გავსულვარ. ის არ ჩამოსულა. ამიტომ, ამ განცხადებას რომ აკეთებ, ორი მოტივაციია: ან ვიღაცამ გითხრა და ვინც გითხრა, ჩათვალე რომ შენი პირადი მტერია, ან კიდევ, არ გადაამოწმე. ეს უფრო უყურადღებობის ბრალია. არ გმატებთ ღირსებას არანაირად ცრუ ინფორმაციის გავრცელება და ტყუილის თქმა, ტიტველი ტყუილის თქმა არის ძალიან სახიფათო. არ შევხედრილვარ მიშას. რაც შეეხება შეხვედრას, თუ შევხვდები და შესაძლებელია შევხვდე ან შესაძლებელია არ შევხვდე, პოლიტიკა ეს არის. შესაძლებელია ბიძინასაც შევხვდე და როცა ასეთი შეხვედრა იქნება დღის წესრიგში, ღიად ვიტყვი ამას, ჩუმად არავის არ ვხვდები. და შევხვდები ერთადერთი მიზნით ამ ადამიანებს, იგივე ბიძინასაც და იგივე მიხეილ სააკაშვილსაც, ქვეყნის პრობლემატიკასთან დაკავშირებით. ჩემ პირად პრობლემატიკაზე არც იმასთან მივალ და არც იმასთან. ამიტომ, მოვერიდოთ შიშველი, ბრტყელი დეზინფორმაციის გავრცელებას. არ შევხვედრილვარ. იმიტომ კი არა, რომ ვთაკილობ, პოლიტიკაში ქალწულობა არ არსებობს. მოცემულობა არის ასეთი: საჭირო იქნება შევხვდები, არ იქნება საჭირო, არ შევხვდები“, განაცხადა გუბაზ სანიკიძემ.