14 თებერვალს, გარდაბნის მუნიციპალიტეტის საკრებულოს თავმჯდომარის მოადგილის, რაფი ორუჯოვის ხელმძღვანელობით, საკრებულოს რიგგარეშე სხდომა ჩატარდა, რომელზეც დეპუტატებმა დღის წესრიგით გათვალისწინებული ორი საკითხი განიხილეს და ხმათა უმრავლესობით დადებითად გადაწყვიტეს.

ცვლილება შევიდა „გარდაბნის მუნიციპალიტეტის 2019 წლის ადგილობრივი ბიუჯეტის დამტკიცების შესახებ“, გარდაბნის მუნიციპალიტეტის საკრებულოს 2018 წლის 24 დეკემბრის №54 დადგენილებაში. კერძოდ, საქართველოს მთავრობის 2019 წლის 22 იანვრის №45 განკარგულებით, სოფლის მხარდაჭერის პროგრამის ფარგლებში განსახორციელებელი პროექტების შესასრულებლად, მუნიციპალიტეტს დამატებით 331 000 ლარი გამოეყო, ჯამში დაფინანსებამ 662 000 ლარი შეადგინა.

1 290 000 ლარამდე გაიზარდა, საჯარო სკოლების რეაბილიტაციისთვის გამოყოფილი თანხა.

გაიზარდა „საქართველოს რეგიონებში განსახორციელებელი პროექტების ფონდის“ დაფინანსება. საქართველოს მთავრობის 2018 წლის 31 დეკემბრის N 2577 განკარგულებით, გარდაბნის მუნიციპალიტეტს დამატებით 2 152 056 ლარი გამოეყო. აღნიშნული თანხით და მუნიციპალიტეტის თანადაფინანსებით, (1 068 444 ლარი) სოფელ მარტყოფში, ღვთაების მონასტერთან მისასვლელი გზა რეაბილიტირდება, დაიგება ასფალტ-ბეტონის საფარი და მოეწყობა ხიდი. საქართველოს რეგიონებში განსახორციელებელი პროექტების ფონდიდან, გარდაბნის მუნიციპალიტეტისთვის გამოყოფილმა ტრანსფერმა მთლიანობაში 4 900 000 ლარი შეადგინა.

საკრებულომ დადებითად გადაწყვიტა, ჯანმრთელობის მდგომარეობის გაუარესების გამო, სოფელ ნორიოში მცხოვრები გოჩა გიუნაშვილისთვის დახმარების გაწევის საკითხი.

ინფორმაციას გარდაბნის საკრებულო ავრცელებს.