საქართველოს პრემიერ მინისტრი მამუკა ბახტაძე „თიბისი ბანკთან“ დაკავშირებით აცხადებს, რომ „ძალიან ცუდია, რომ ჩვენ კიდევ ერთხელ მოვისმინეთ პოლიტიკური სპეკულაციები, რომ ამ ფაქტს კავშირი აქვს ანაკლიის პორტთან“.

მან ქართველ ჟურნალისტებს მიუნხენში ამ თემაზე დასმული კითხვის საპასუხოდ უთხრა, რომ ეროვნულმა ბანკმა, როგორც მარეგულირებელმა, მიიღო გადაწყვეტილება და თუკი „ვინმეს აქვს ამ საკითხთან პრეტენზია, სწორედ შინაარსობრივი არგუმენტები უნდა ისმოდეს და არა პოლიტიკური სპეკულაციები“.

„სამწუხაროდ, ჩენ კიდევ ერთხელ მოვისმინეთ პოლიტიკური სპეკულაციები ამ საკითხთან დაკავშირებით. „თიბისი ბანკი“ გახლავთ სისტემური მნიშვნელობის ბანკი, „თიბისი ბანკი“ არის ძლიერი ფინანსური ორგანიზაცია. რა თქმა უნდა, არის ჩვენი ეკონომიკის წარმატება, რომ „თიბისი ბანკი“ წარმოდგენილია ლონდონის საფონდო ბირჟაზე და რა თქმა უნდა, ეს ყველას კარგად აქვს გააზრებული, მაგრამ, სამწუხაროდ, ჩვენ კიდევ ერთხელ მოვისმიენთ პოლიტიკური სპეკულაცია ამ საკითხებზე. ეროვნულმა ბანკმა, როგორც რეგულატორმა მიიღო გადაწყვეტილება და ბუნებრივია, მე შინაარსობრივ შეფასებას ამისას ვერ გავაკეთებ, მაგრამ მე ვიცი ერთი - ეროვნული ბანკი ყოველთვის მოქმედებს ძალიან მაღალი პროფესიული სტანდარტების დაცვით და ეს არის ყველა საერთაშორისო ფინანსური ინსტიტუტის პოზიცია.

„თიბისი ბანკი“ გახლავთ სისტემური ბანკი, ძლიერი ბანკი და ეს არის ერთ-ერთი ყველაზე წამყვანი ფინანსური ინსტიტუტი არა მხოლოდ ფინანსური სექტორისთვის, არამედ ზოგადად ჩვენი ეროვნული ეკონომიკისთვის. აქედან გამომდინარე, მე კიდევ ერთხელ მსურს ყველას მოვუწოდო, რომ თავი შეიკავონ პოლიტიკური სპეკულაციებისგან. ეს გახლავთ ძალიან ჩარჩოში მოქცეული პროფესიული მიდგომებიდან გამომდინარე შესაფასებელი სიტუაცია და ამას არანაირი კავშირი პოლიტიკასთან არ აქვს. მარეგულირებელმა მიიღო შესაბამისი გადაწყვეტილება და თუ ვინმეს აქვს ამ საკითხთან პრეტენზია, სწორედ შინაარსობრივი არგუმენტები უნდა ისმოდეს და არა პოლიტიკური სპეკულაციები. ეს ნამდვილად არ წაადგება საქმეს. მით უმეტეს, ძალიან ცუდია, რომ ჩვენ კიდევ ერთხელ მოვისმინეთ პოლიტიკური სპეკულაციები, რომ ამ ფაქტს კავშირი აქვს ანაკლიის პორტთან. მინდა ყველას შევახსენო, რომ სწორედ ჩვენი პოლიტიკური გუნდი გახლავთ ინიციატორი ამ უმნიშვნელოვანესი იდეის და ჩვენ, ყველა ფინანსურ ინსტიტუტთან, როგორც მთავრობა, აქტიურად ვმონაწილეობთ, რომ რაც შეიძლება დროულად მოხდეს ფორმირება და დაიწყოს დაფინასება საერთაშორისო ფინანსური ორგანიზაციების მხრიდან ამ უმნიშვნელოვანესი პროექტის. ეს არის სტრატეგიული მნიშვნელობის პროექტი ჩვენი ქვეყნისთვის. ეს არის ძალიან მნიშვნელოვანი პროექტი ამავე დროს რეგიონისთვის. ჩვენ ავიღეთ ვალდებულება, ჩვენ შევძელით ის, რომ ძალიან მნიშვნელოვანი და ინტენსიური მოლაპარაკებების შედეგად ყველა წამყვანმა ფინანსურმა ინსტიტუტმა გაითვალისწინა ფაქტობრივად ანაკლია და მიმდინარეობს განხილვა მისი დაფინანსების, შესაბამისად, ამის პოლიტიკურ სპეკულაციებში გადატანა, რა თქმა უნდა, გახლავთ სრული უპასუხისმგებლობა. საქართველოს სჭირდება ღრმაწყლოვანი პორტი და საქართველოს აუცილებლად ექნება ის“, განაცხადა მამუკა ბახტაძემ.