დეპუტატი დავით ჭიჭინაძე „ქართული ოცნების“ პოლიტსაბჭოს სხდომის დასრულების შემდეგ, პოლიტსაბჭოს მიერ გავრცელებულ განცხადებას ეხმაურება.

„პოლიტსაბჭოს განცხადებები ამ ბოლო დროს ძალიან გახშირდა და თან ერთმანეთის გამომრიცხავიც არის და აქედან გამომდინარე, დღეს პირდაპირ უარი ეთქვა, ასე რომ ვთქვათ, ჩვენს ინიციატივას და არ მგონია, ხვალ დეპუტატებმა მხარი დაუჭირონ. ძალიან საინტერესოა, უბრალოდ, ხალხს ვინ ეტყვის უარს და შემდეგ ის პროექტი, რომელსაც ესენი ამზადებენ, რომ იტყვიან მზურნველობით ხალხზე და სამართლიან სასამართლოზე და თუ გავიხსენებთ მათ წინა განცხადებას, გარკვეულწილად პოლიტსაბჭოში გაორებები ემართებათ. ბიძინა ივანიშვილის გარეშე, რა თქმა უნდა, ეს არ მოხდებოდა და კობახიძე ეტყობა იმიტომ არის ბედნიერი, რომ მოახერხა მისი დარწმუნება, რომ ეს კანონი უნდა შეჩერებულიყო", განაცხადა დავით ჭიჭინაძემ.

„ქართული ოცნების“ ცენტრალურ ოფისში პარტიის პოლიტსაბჭოს სხდომის დასრულების შემდეგ პოლიტსაბჭომ განცხადება გაავრცელა, რომელშიც აღნიშნულია, რომ საჯარო სივრცეში სასამართლოს საკითხთან დაკავშირებული აქტიური დისკუსია გაგრძელდება.

პოლიტსაბჭო გამოხატავს „სრულ მზაობას, დაინტერესებულ მხარეებთან კონსულტაციების საფუძველზე, მოვამზადოთ იმგვარი წინადადებები მოსამართლეების უვადოდ დანიშვნის საკითხზე, რომლებიც იქნება შესაბამისობაში საქართველოს კონსტიტუციასთან და ევროსაბჭოს რეკომენდაციებთან“.