გერმანიის პრეზიდენტმა, ფრანკ-ვალტერ შტაინმაიერმა გერმანიაში ოფიციალურ ვიზიტად მყოფ სალომე ზურაბიშვილთან ბერლინში, ბელვიუს სასახლეში შეხვედრის შემდეგ განაცხადა, რომ საქართველოს პრეზიდენტის, სალომე ზურაბიშვილის გერმანიაში ვიზიტი ორ ქვეყანას შორის კავშირის ნიშანია და საქართველოსთან „ძალიან ბევრი რამ აკავშირებს“.

„ქალბატონო პრეზიდენტო, თქვენი ვიზიტი არის ნიშანი ჩვენი კავშირისა ორ ქვეყანას შორის - ვიზიტი, რომელიც ძალიან კარგ დროს შედგა და თქვენი პირველი ვიზიტია პარიზის შემდეგ. ძალიან გამახარა ჩვენმა საუბრებმა, ჩვენმა შეხვედრამ, ჩვენი საუბრების გულახდილობამ. თქვენი იცით, რომ ძალიან ბევრი რამ მაკავშირებს თქვენს ქვეყანასთან. გერმანიასა და საქართველოს მეგობრობის გრძელვადიანი ტრადიცია აკავშირებს. 2017 წელს გერმანია-საქართველოს წელიწადი იყო, ასევე საქართველო ფრანკფურტის წიგნის ბაზრობის სტუმარი იყო. ეს არის ნიშანი, რომ ჩვენ კულტურული კავშირები ძალიან მჭიდროა“, მიმართა სალომე ზურაბიშვილს ფრანკ-ვალტერ შტაინმაიერმა.

გერმანიის პრეზიდენტმა ასევე განაცხადა, რომ ფრანკფურტის წიგნის ბაზრობაზე საპატიო სტუმრის სტატუსით წარდგენით საქართველომ ქართული კულტურის დიდი სიმდიდრე აჩვენა, რაც გერმანიაში აქამდე არასდროს მოხვედრიათ თვალში.

„ეს მე ჩემი თვალით ვნახე. საქართველოში ხშირად ჩამოვსულვარ და საქართველოს განვითარების სხვადასხვა ეტაპებს ვაკვირდებოდი ბოლო 30 წლის განმავლობაში. ვფიქრობ, შეგვიძლია ვთქვათ, რომ საქართველო ამ წლების განმავლობაში იყო საჩვენებელი, ყოველ შემთხვევაში, ეკონომიკური რეფორმების თვალსაზრისით, საჩვენებელი, სამაგალითო ქვეყანა და ძალიან კარგი, შთამბეჭდავი განვითარება გვიჩვენა“, განაცხადა ფრანკ-ვალტერ შტაინმაიერმა.