გერმანიის პრეზიდენტმა, ფრანკ-ვალტერ შტაინმაიერმა გერმანიაში ოფიციალურ ვიზიტად მყოფ სალომე ზურაბიშვილთან ბერლინში, ბელვიუს სასახლეში შეხვედრის შემდეგ განაცხადა, რომ ინტენსიურად აკვირდებოდნენ საპრეზიდენტო არჩევნებს, „ხისტად“ მიმდინარე საარჩევნო პროცესს და „დიდი კმაყოფილება“ გამოხატა მას შემდეგ, რაც „ეუთო-ს სადამკვირვებლო მისიამ თქვა, რომ ეს არჩევნები პროფესიონალურად იყო მომზადებული, კარგად იყო ადმინისტრირებული და სამართლიანად ჩატარდა“.

ამასთან, გერმანიის პრეზიდენტმა იმედი გამოთქვა, რომ „ეს ძლიერი პოლარიზაცია, რომელმაც თავი იჩინა საარჩევნო პროცესში, არ დარჩება საქართველოში“.

„ჩვენ ვისაუბრეთ იმ მჭიდრო კავშირების შესახებ, რომელიც საქართველოს ევროკავშირთან აკავშირებს. საქართველოს საკმაოდ ამბიციური ევროპული მისწრაფებები აქვს – ევროკავშირი, ევროპა „ბრექსიტთან“ დაკავშირებით, საკუთარ თავში ერკვევა. თქვენ მითხარით, რომ ამ დროს სტრუქტურული დაკავშირება ევროკავშირის სტრუქტურებში, ინფრასტრუქტურულ პროექტებში გაერთიანება შესაძლოა, ძალიან ბევრის მომცემი იყოს და ახლაც არის ბევრის მომცემი. ჩვენ ვისაუბრეთ საქართველოს შიდა პოლიტიკაზე. რა თქმა უნდა, ეს მოსალოდნელიც იყო. ინტენსიურად ვაკვირდებოდით საპრეზიდენტო არჩევნებს. ჩვენ ვნახეთ და ვიგრძენით კიდეც, რომ ხისტად მიმდინარეობდა ეს საარჩევნო პროცესი, მაგრამ დიდი კმაყოფილებით ვნახეთ, რომ მაგალითად ეუთო-ს სადამკვირვებლო მისიამ თქვა, რომ ეს არჩევნები პროფესიონალურად იყო მომზადებული, კარგად იყო ადმინისტრირებული და სამართლიანად ჩატარდა. ჩვენი იმედი ამაში მდგომარეობს და ვგონებ, თქვენი იმედიც არის, ქალბატონო პრეზიდენტო, რომ ეს ძლიერი პოლარიზაცია, რომელმაც თავი იჩინა საარჩევნო პროცესში, არ დარჩება საქართველოში. პოლიტიკური მოთამაშეები, ისე როგორც ეს დემოკრატიაშია საჭირო, მზად იქნებიან და დაუბრუნდებიან თანამშრომლობის ფორმატს. ეს საშუალებას მოგცემთ, რომ საქართველოში განახორციელოთ რეფორმების ის დიდი პაკეტი, რომელიც თქვენ დაგეგმილი გაქვთ“, განაცხადა პრეზიდენტმა შტაინმაიერმა.