ფრაქცია „ნაციონალური მოძრაობის დეპუტატის, ნიკა მელიას განცხადებით, ქვეყანაში უამრავი ინფრასტრუქტურული პროექტია გაჩერებული და აღნიშნულთან დაკავშირებით იგი პასუხს ინფრასტრუქტურისა და რეგიონული განვითარების მინისტრის, მაია ცქიტიშვილისაგან მოითხოვს.

პარლამენტში მელიამ ცქიტიშვილს სთხოვა განემარტა თუ რა ბედი ეწია 2014 წელს კომპანია „ალტკომისთვის“ გადარიცხულ 24 მილიონ ევროს, რომელიც დეპუტატის თქმით, სამინისტრომ საგზაო-სამშენებლო კომპანიას გრიგოლეთი-სამტრედიის გზის მონაკვეთთან დაკავშირებული სამუშაოების საწარმოებლად გადაურიცხა, თუმცა „კომპანიამ ფული ჯიბეში ჩაიდო, თითი-თითზე არ დაკარებულა“ და ამ ხნის განმავლობაში „არავინ პასუხისგებაში არ არის მიცემული“.

„ერთ კონკრეტულ პროექტთან დაკავშირებით მინდა კითხვა დაგისვათ. საგზაო-სამშენებლო კომპანია ალტკომს გრიგოლეთი-სამტრედიის გზის მონაკვეთთან დაკავშირებული სამუშაოები უნდა ეწარმოებინა 2014 წელს და ვადა ჰქონდა 30 თვე. 2014 წელს, მართალია, მაშინ თქვენ არ ბრძანდებოდით მინისტრი, მაგრამ მთავრობის წევრი ბრძანდებით და პასუხისმგებლობას უნდა იღებდეთ, 24 მილიონი ევრო გადაურიცხეთ და თითი-თითზე არ დაკარებულა. ამ კომპანიამ ჯიბეში ფული ჩაიდო და კაცმა არ იცის, სად არის. არავინ პასუხისგებაში არ არის მიცემული დღემდე, 5 წელიწადი გავიდა და არავინ პასუხისგებაში არ არის მიცემული. ყველაფერს რომ თავი დავანებოთ, უბრალოდ საინტერესოა ეს, რომ 24 მილიონი ევრო რომ დაიკარგა, ამაზე პასუხს ვინ აგებს? და მეორე, შარშან დაიწყეთ, როგორც იქნა, იგივე მონაკვეთზე მშენებლობა უკვე ჩინური კომპანიის ფარგლებში, 150 მილიონი ლარი უნდა აეთვისებინათ და მხოლოდ 52 მილიონი ლარი აითვისა. ანუ, ვერ მუშაობთ. ეს არის ნათელი ილუსტრაცია ერთი პროექტის ფარგლებში მხოლოდ. არავის არ უხარია, რომ ეს პროექტები ფლავდება... აი, ამასთან დაკავშირებითაც რომ გესაუბრათ, რა ვერ გააკეთეთ, რატომ ვერ გააკეთეთ, მე ვფიქრობ, უფრო კარგად წარმოგაჩენდათ ეს ყველაფერი თქვენ, როგორც ცალკე აღებულ ერთ მთავრობის წევრს“, უთხრა ნიკა მელიამ მაია ცქიტიშვილს.