პარლამენტის პირველმა ვიცე-სპიკერმა, თამარ ჩუგოშვილმა რამდენიმე წუთის წინ პარლამენტში გამოსვლისას განაცხადა, რომ „უნდა შეწყდეს მოსამართლეების უვადოდ განწესება“ და „თუკი იუსტიციის უმაღლესი საბჭო სულ მოკლე ხანში არ გააკეთებს განცხადებას უვადოდ დანიშვნების შეჩერების თაობაზე, ამ სიტუაციიდან გამოსავალი არის, რომ პარლამენტმა გამოიწვიოს ხუთივე წევრი, რომელიც ჩვენ დავნიშნეთ იუსტიციის უმაღლეს საბჭოში“.

„მე მინდა შემოგთვაზოთ ერთი გზა და აქვე მინდა ბოდიში მოვუხადო ჩემს კოლეგებს, რომლებთანაც მე ეს საკითხი არ განმიხილავს და ახლა მე უმრავლესობის დროით გამოვდივარ და პირდაპირ ამ ტრიბუნიდან უნდა ვთქვა ჩემი მოსაზრება და მინდა შემოგთავაზოთ შემდეგი გზა. თუკი იუსტიციის უმაღლესი საბჭო სულ მოკლე ხანში არ გააკეთებს განცხადებას უვადოდ დანიშვნების შეჩერების თაობაზე, მე ვფიქრობ, ამ სიტუაციიდან გამოსავალი არის, რომ პარლამენტმა გამოიწვიოს ხუთივე წევრი, რომელიც ჩვენ დავნიშნეთ იუსტიციის უმაღლეს საბჭოში. მოსამართლეები ჩვენს მიერ დანიშნული წევრების გარეშე ვერ მიიღებენ ვერანაირ გადაწყვეტილებას. ეს არის გამორიცხული. ისინი ყველა მოსამართლეს ნიშნავენ სწორედ ჩვენს მიერ დანიშნული იუსტიციის უმაღლესი საბჭოს წევრების მხარდაჭერით და ხმებით“, განაცხადა თამარ ჩუგოშვილმა, რომელმაც უსტიციის უმაღლესი საბჭო პოლიტიკური კრიზისის შექმნაში დაადანაშაულა.

„უმრავლესობა თუ ამ გზას აირჩევს, პროცესებს სწორი გზით წაიყვანს და ერთიანობას შეინარჩუნებს“, აღნიშნა ჩუგოშვილმა.