„ერთიანი ნაციონალური მოძრაობის“ პოლიტიკური საბჭოს წევრი ზაზა ბიბილაშვილი „ქართული ოცნების“ მიერ საკონსტიტუციო უმრავლესობის დაკარგვას ეხმაურება და აცხადებს, რომ იმ ფონზე, როდესაც „კონსტიტუცია უკვე გაუპატიურებულია“, „ისედაც აღარ სჭირდებათ რუსებს ფორმალური საკონსტიტუციო უმრავლესობა“.

„კონსტიტუცია უკვე გაუპატიურებულია და მორგებულია ივანიშვილის ოჯახზე - ანუ ამისთვის ისედაც აღარ სჭირდებათ რუსებს ფორმალური საკონსტიტუციო უმრავლესობა. პუტინმა რომ დარეკოს, გრუ-ს ოფიცერი მყავს ციხიდან გამოსაშვები პოლიტპატიმრის სტატუსითო, რუსეთის პატრიარქმა უწყის, რომელი მიასწრებს პულტზე თითის დასაჭერად - ბესელია, ჩუგოშვილი, ინაშვილი თუ ნაცვლიშვილი. ხოდა, ნუ მოვტყუვდებით: სანამ შუშის კოლბაში რუსული ოკუპაციის მუზეუმი არ გადავა, ხოლო თავად კოლბა მუზეუმის ბოლო ექსპონატად არ გამოცხადდება, ფორმალურად რომელ პარტიებზე გადანაწილდებიან მკვლელები და მკვლელების უანგარო თუ ანგარებიანი მფარველები, არაფერს ცვლის“, წერს ბიბილაშვილი „ფეისბუქზე“.