„ერთიანი ნაციონალური მოძრაობის“ პოლიტიკური საბჭოს თავმჯდომარე ნიკა მელია აცხადებს, რომ „ქართული ოცნება“ იწყებს დაშლას და საკონსიტუციო უმრავლესობასთან ერთად, ძალიან მალე ხელისუფლებასაც დაკარგავს, პარტიის ლიდერი ბიძინა ივანიშვილი კი „შეშინებული და ნირწამხდარია“ და „მხოლოდ ორიენტირებული ხელისუფლების შენარჩუნებაზე, უშვებს სულ უფრო და უფრო მეტ შეცდომას და მისი ავტორიტეტი დღითი დღე იფლითება და იფლითება“.

აღნიშნულის შესახებ მან „TV პირველის“ პირდაპირ ეთერში ჩართვისას განაცხადა.

„სულ არ არის ბიძინა ივანიშვილი ძლევამოსილი. უბრალოდ ამ ადამიანს ბერკეტები აქვს სახელისუფლებო, მიტაცებული და ‘მანდრაჟის’ ქვეშ მოქმედებს დიახაც. ბოდიში, მაგრამ არაფერი ცუდი სიტყვა არ არის - შეშინებული, ნირწამხდარი, მხოლოდ ორიენტირებული ხელისუფლების შენარჩუნებაზე, უშვებს სულ უფრო და უფრო მეტ შეცდომას და მისი ავტორიტეტი დღითი დღე იფლითება და იფლითება, იმდენად რამდენადაც „ქართული ოცნების“ უმრავლესობის რიგებშიც კი ვერ ახერხებს, რომ შეარიგოს, მოარიგოს თუ როგორც გენებოთ, საკუთარი გუნდის წევრები. „ქართული ოცნება“ იწყებს დაშლას, არც მეტი და არც ნაკლები, არა მხოლოდ დაკარგავს იგი კონსტიტუციურ უმრავლესობას, არამედ დაკარგავს ძალიან მალე ხელისუფლებას მთლიანად და რატომ, ამას აქვს თავისი ობიექტური ახსნა. დააკვირდით რითი არიან დაკავებულნი უკანასკნელი წლების განმავლობაში - მხოლოდ და მხოლოდ ურთიერთ საქმის გარჩევებით და აღარც მალავენ, რომ სავარძლებზე არიან ჩაბღაუჭებულები და თითქოს აღარ არსებობს ხალხი, როგორც ასეთი. აღარ ახსენებენ არც სამუშაო ადგილებს, არც პენსიებს, არც იმას, რომ ყოველი მე-6 ადამიანი ამ ქვეყანაში ვალით იკვებება და ყოველი მესამე პენსიონერი“, განაცხადა ნიკა მელიამ.