„ქართული ოცნების“ ცენტრალურ ოფისში პარტიის თავმჯდომარესთან, ბიძინა ივანიშვილთან უმრავლესობის იმ დეპუტატთა 4-საათიანი შეხვედრის დასრულების შემდეგ, რომელთაც 21 თებერვალს ეკა ბესელიას პარლამენტში წარდგენილ კანონპროექტს დაუჭირა მხარი, ნუკრი ქანთარიამ განაცხადა, რომ შეხვედრაზე არავის გარიცხვის საკითხი არ განხილულა და „როგორც ქუხს, ისე არ წვიმს“.

მისი თქმით, ივანიშვილთან გამართულ შეხვედრაზე სხვადასხვა საკითხი განიხილეს, სიახლეებსა და ინიციატივებზე და „ძალიან მწვავე პრობლემებზე“ ისაუბრეს, თუმცა ქანთარიამ სხვა დეტალები არ გაამჟღავნა.

„როგორც ქუხს, ისე არ წვიმს, მოგეხსენებათ და ასეა ამჟამადაც. იყო შეხვედრა პარტიის თავმჯდომარესთან გარკვეული ჯგუფის, ჩვენი და იყო ძალიან საქმიანი, გულწრფელი და ძალიან ბევრ პრობლემაზე მოხდა პირუთვნელი საუბარი. არავინ არავის არ გაურიცხავს და ეს საკითხი არ იყო განხილვის თემა. იყო სხვა ძალიან მწვავე პრობლემები, რომელიც არის და ჩვენ ამაზე ინფორმაციაც გავიგეთ, გვქონდა საუბარი და საერთოდ პარტიის თავმჯდომარე აპირებს, რომ ასე უმრავლესობის სხვა ჯგუფებსაც შეხვდეს“, განაცხადა ნუკრი ქანთარიამ მედიის წარმომადგენლებთან კომენტირებისას.