დამოუკიდებელი დეპუტატი, საპარლამენტო უმრავლესობის ყოფილი წევრი ეკა ბესელია ყოფილ თანაგუნდელებზე საუბრობს და ამბობს, რომ კილაძეები, მდინარაძეები, ზარდიაშვილები და ა.შ. უბრალოდ დავალებების შემსრულებლები არიან.

შეკითხვაზე, ბიძინა ივანიშვილმა ეკა ბესელიას და მის თანამოაზრეებს მათთან დაპირისპირებული დეპუტატები ამჯობინა თუ მოსამართლეთა კორპუსი, რომელიც მის საკანონმდებლო ინიციატივის არ ეთანხმებოდა, ბესელიამ განაცხადა, რომ მმართველი გუნდის აღნიშნული წევრები არ შეიძლებოდა ყოფილიყვნენ საპირწონე „რომელიმე ჩვენგანის".

„ნუ მივანიჭებთ მათ იმაზე მეტ მნნიშვნელობას, ვისაც არ აქვს რეალურად ასეთი სტატუსი - კილაძეები, მდინარაძეები, ზარდიაშვილები არაფრით არ შეიძლება ყოფილიყვნენ საპირწონე ლევან გოგიჩაიშვილის ან რომელიმე ჩვენთაგანის, ძალიან კარგად იცის ეს ბიძინა ივანიშვილმა და არ სჭირდება მას ამის ახსნა. ისნი არიან უბრალოდ შემსრულებლები იმ დავალებების, რასაც იღებენ. აქ მთავარი სხვა რამეა - ფუნდამენტური საკითხებია მთავარი განმასხვავებელი. სასამართლო კორპუსი - მოსამართლეები არიან მსხვერპლნი თუ არიან მოძალადეები. ეს ფუნდამენტური საკითხია იმიტომ, რომ როგორც აფასებ იმ წარსულს, აქედან გამომდინარე დგამ მერე ნაბიჯებს", განაცხადა ეკა ბესელიამ „ტვ. პირველის"  გადაცემაში „პირველები" სტუმრობისას.

საპარლამენტო უმრავლესობის დატოვების შესახებ ეკა ბესელიამ გუშინ, 22 თებერვალს განაცხადა. დეპუტატის აღნიშნულ გადაწყვეტილებამდე კი, საკანონომდებლო ორგანომ ჩააგდო მისივე კანონპროექტი, რომელიც მოსამართლეთა უვადოდ დანიშვნის 5 წლით გადავადებას ეხებოდა.