ვენესუელას სასაზღვრო ქალაქებში შაბათს არეულობებმა იფეთქა იმ დროს, როცა კოლუმბიიდან და ბრაზილიიდან ჰუმანიტარული ტვირთებით სავსე სატრანსპორტო საშუალებების ქვეყანაში შესვლა პრეზიდენტმა ნიკოლას მადურომ დაბლოკა.

მშვიდობიან მოსახლეობას, რომელიც საკვების და წამლების მიღებას ცდილობდა, სამხედროებმა რეზინის ტყვიები დაუშინეს და მათი მიმართულებით ასევე ცრემლსადენი გაზი გაუშვეს.

როგორც BBC ადამიანის უფლებადაცველ ჯგუფებზე დაყრდნობით იუწყება, ზოგიერთ მშვიდობიან მოქალაქეს საბრძოლო ტყვიებიც ესროლეს. შაბათს, სულ მცირე ორი ადამიანია მოკლული, მათ შორის 14 წლის ბიჭი. ასევე 2 ადამიანი მოკლეს პარასკევსაც.

მშვიდობიან მოქალაქეებზე თავდასხმა დაგმო ამერიკის შეერთებული შტატების სახელმწიფო მდივანმა მაიკ პომპეომ. მან მომხდარში ბრალი მადუროს დასდო.

„ჩვენი ღრმა მწუხარება და სამძიმარი მათი ოჯახებისადმი ვინც დაიღუპა ამ კრიმინალური ქმედებების შედეგად. ჩვენ ვუერთდებით მათ მოთხოვნებს სამართლიანობისთვის“, დაწერა პომპეომ „თვითერზე“.

ოპოზიიციის ლიდერმა და დროებითმა პრეზიდენტმა ხუან გუაიდომ, რომელმაც დახმარების ქვეყანაში შეტანის ორგანიზება მოახდინა, ასევე დაგმო უსაფრთხოების ძალების ქმედება.

გუაიდო, რომელიც ათეულობით სახელმწიფომ აღიარა ვენესუელას დროებით ლიდერად, ორშაბათს კოლუმბიის დედაქალაქ ბოგოტაში აშშ-ის ვიცე-პრეზიდენტს, მაიკ პენსს შეხვდება.

გუაიდო, მიუხედავად იმისა, რომ მას მადუროს მთავრობამ ქვეყნის დატოვება აუკრძალა, მაინც აპირებს ბოგოტაში ჩასვლას და რეგიონული „ლიმას ჯგუფის“ ლიდერებთან შეხვედრას.

შაბათ საღამოს, გუაიდომ „თვითერზე“ ესპანურ ენაზე მოუწოდა საერთაშორისო საზოგადოებას, რომ „ყველა ღონე იხმარონ“ იმისათვის, რომ „გაათავისუფლონ“ ვენესუელა მადუროსაგან, რომელიც მოწოდებების მიუხედავად თანამდებობის დატოვებას არ აპირებს.