„ერთიანი ნაციონალური მოძრაობის“ პოლიტიკური საბჭოს თავმჯდომარე ნიკა მელია აცხადებს, რომ დიდი სიამოვნებით დაუჭირა მხარი ეკა ბესელიას მიერ საერთო სასამართლოების კანონში შესატან ცვლილებებს, რომელიც მოსამართლეთა უვადოდ განწესებაზე 5-წლიანი მორატორიუმის გამოცხადებას გულისხმობდა და რომელიც პარლამენტში პირველი მოსმენით კენჭისყრისას ჩავარდა.

ნიკა მელიამ „იმედის“ გადაცემაში - „პირისპირ“ - საუბრისას თქვა, რომ ამის მიზეზი იყო ის, რმ მას არ უნდა მომავალი 30 წლის განმავლობაში ისევ მურუსიძე და ისევ ჩინჩალაძე იყვნენ სასამართლო სისტემის ხელმძღვანელები.

„მე არ დამიმალავს, დიდი სიამოვნებით დავუჭირე მხარი, მიუხედავად იმისა, რომ ვერასოდეს ვერ წარმოვიდგენდი, რომელიმე „ქართული ოცნების“ დეპუტატის მიერ ინიცირებულ კანონპროექტს დავუჭერდი მხარს, მაგრამ მე დავუჭირე არა ქალბატონი ეკა ბესელიას და მის კანონპროექტს, არამედ ჩემი შვილის და ჩვენი პატარა თაობის მომავალს, იმიტომ რომ, ეს კანონპროექტი იძლეოდა შესაძლებლობას, რომ დროებით მაინც მეტასტაზირების პროცესი შეჩერებულიყო სასამართლო სისტემაში და მურუსიძის და ჩინჩალაძის ხელით არ დაინიშნოს ათეულობით მორჩილი მოსამართლე. წარმოიდგინეთ, ხვალ რომ ბავშვი დაიბადება და რაც შეიძლება ღმერთმა ბევრი დაბადოს ამ ქვეყანაში, 30 წელი რომ გადავითვალოთ, ისევ მურუსიძე და ისევ ჩინჩალაძე უნდა გვყავდეს ბიძინა ივანიშვილის დღის წესრიგით ჩვენ სასამართლო სისტემის ხელმძღვანელებად. ამას დავუჭირე მხარი, რომ იქნებ ეს რაღაცნაირად შეჩერდეს დროებით“, განაცხადა ნიკა მელიამ.